ABADÇILAR / Faiq Abdullayev

ABADçı:
Faiq Abdullayev
Kodu:
97
Region:
Masallı

“ABAD”ın dəstəklədiyi Abdullayevlər ailəsi cem və mürəbbə istehsalı ilə məşğuldur. Masallı rayonu Sərçuvar kəndinin sakinləri olan ailə artıq 35 ildir ki, bu istiqamətdə fəaliyyət göstərir.

Ailə başçısı Faiq Abdullayevin sözlərinə görə, onlar mürəbbə hazırlanmasında istehsal etdikləri məhsulları elə həyətyanı sahələrindən toplayırlar.

“Biz bağımızdan göyəm, zoğal, çiyələk, böyürtkən, ağ gilas, ərik, heyva, tut kimi müxtəlif məhsullar toplayırıq. Bu meyvə və giləmeyvələr öz dadı və keyfiyyəti ilə fərqlənirlər.”- deyə, Faiq Abdullayev qeyd edir.

Abdullayevlər ailəsi həmçinin təsərrüfatlarından topladıqları müxtəlif gül ləçəklərindən də mürəbbə hazırlayırlar.

Əvvəllər Faiq Abdullayev hazırladığı məhsulları yarmarkalarda təqdim edib.

Bu sahədə ilk uğurlarını görən ailə başçısı daim ailə biznesini genişləndirmək barədə düşünüb və Masallıda regional “ABAD” mərkəzinə ilk müraciət edənlərdən olub.

“İndiyədək mürəbbə və cem kimi məhsulları yalnız kustar üsulla, heç bir texnoloji yeniliklər olmadan hazırlayırdıq. Bu, böyük vaxt itkisinə səbəb olurdu. Digər tərəfdən, kustar üsulla hazırlanmış məhsulların satışının genişləndirilməsi ilə bağlı çətinliklərlə qarşılaşırdıq.

Bu sahədə zəruri dəstək almaq, ailə brendimizi yaratmaq, satış bazarımızı genişləndirmək üçün “ABAD”a müraciət etdik. Müraciətimiz müsbət qiymətləndirildi və pilot layihə çərçivəsində bizə müasir istehsalı avadanlıqları təqdim olundu.

Hazırda bu avadanlıqlardan istifadə etməklə müxtəlif mürəbbə və cem məhsullarının sınaq istehsalını həyata keçiririk. “ABAD” həmçinin ailə brendinin yaradılması, gələcəkdə məhsulların satışının təşkili kimi işlərdə də bizə dəstək olur.

Düşünürəm ki, belə bir şəraitdə hazırlanmış məhsullarımız bazarda öz layiqli yerini tuta biləcək. Məqsədimiz ailəmizin brendini inkişaf etdirmək və təkcə ölkəmizdə deyil, xarici bazarlarda da tanıtmaqdır”, - deyə, Faiq Abdullayev bildirir.