Uşaq yaşlarından rəsmə, incəsənətə marağı olan Sabir bəy neftlə tanışlığını belə xatırlayır:

“Hələ 5-6 yaşım olardı bir gün nənəmin müalicəsi üçün Naftalan şəhərindən evimizə neft gətirmişdilər. İstifadə olunduqdan sonra bir qədərini ayırıb həyətdə evimizin divarlarına müxtəlif rəsmlər və cizgilər çəkməyə başladım”.

Sonralar Sabir bəy xam nefti çətinliklə tapdığı üçün bu sahədə fəaliyyətini davam etdirməkdə çətinlik çəkir.

Lakin maraq onu hər vasitəyə əl atmağa vadar edir. Uşaqlığını evlərindəki odun sobasının borularına hopmuş his ilə rəsm çəkməklə keçirən Sabir bəy illər sonra Bakıya gəlir və peşəkar fəaliyyətə başlayır.

O, neft buruqlarından yığdığı xam neft ilə kətan üzərində rəsmlər çəkməyə başlayır. Azərbaycanın neft səltənətini kətan üzərində canlandıran Sabir bəy “Neft Daşları”, neft buruqları, kimi mövzularla yanaşı, Azərbaycan mədəniyyətinin ən müxtəlif mövzuları üzrə bənzərsiz rəsm əsərləri yaradır.

Bu gün Sabir bəy və onun yaradıcılığı bütün dünyada tanınır və qəbul edilir. Əl işləri bir çox ölkələrdə şəxsi kolleksiyalarda saxlanan Sabir bəy eyni zamanda bir çox sərgilərdə iştirak edib və böyük uğurlara imza atıb.

Sabir bəyin öz yaradıcılığında əsas yer verdiyi ideya Azərbaycan mədəni irsinin bütün dünyaya tanıdılmasıdır.

Sabir bəy “ABAD” layihəsinə qoşularaq öz fəaliyyətini daha da genişləndirəcəyini və daha böyük uğurlara imza atacağını düşünür.

Artıq onun əl işləri dünyanın məşhur muzey və sərgiləri ilə yanaşı, “ABAD” sənətkarlıq mərkəzlərində də təqdim olunur.