Xəbərlər

"ABAD" publik hüquqi şəxsin 2021-ci il hesabatı

“ABAD” publik hüquqi şəxs 2021-ci il ərzində də öz fəaliyyətini uğurla davam etdirib. Ötən ildə 5 yaşını qeyd edən qurumdan dəstək alan “ABAD”çıların sayı 500-ü ötüb. 2021-ci il ərzində daha bir “ABAD Factory” İstehsalat Kompleksinin açılışı baş tutub. Sayca üçüncü olan Quba “ABAD Factory” qablaşdırma vasitələrinin istehsalı üzrə istiqamətlənib. Müvafiq ildə mərkəzlərin də sayında artım olub. Belə ki, "PAŞA Holdinq"in dəstəyi ilə 12 yeni “ABAD” stendi açılaraq sayları 28-ə çatıb. Stendlərin yerləşdiyi marketlərin sayında da artım müşahidə olunur. Beləki, “Bravo” marketlər şəbəkəsi ilə bərabər, “ABAD” stendləri artıq “Grandmart”, “Bolmart”, Rahat”, “Bizim Market” və digər şəbəkələrdə də fəaliyyət göstərir. Qida məhsullarının istehsalı sahəsində məhsulların çeşidi artıb. Tovuz “ABAD Factory” Bitkilərin Qurudulması və Emalı İstehsalat Kompleksində hazırlanan 7 növ “Fitolife” müalicəvi otlardan çaylar, “Narlı” brendi altında müxtəlif marinad və souslar, yeni növ ədviyyatlar, ləvəngilər, içkilər, yağ və pendirlər "ABAD" qida assortimentinə daxil edilib. Həmçinin 2021-ci ildə “ABAD” qida məhsullarının ixracı istiqaməində mühüm addımlar atılıb. Belə ki, “ABAD” məhsulları artıq Yaponiya və Qazaxıstanda təqdim olunur. Dekorativ-tətbiqi xalq sənətkarlıq nümunələri də artıq yalnız 10 “ABAD” etno-butiklərin də deyil, həmçinin elektronika, məişət texnikası, mebel, tekstil və digər ev əşyalarının satışı üzrə ixtisaslaşmış Azərbaycanın ən böyük riteyl şəbəkəsi olan “Kontakt Home”da da fəaliyyətə başlayıb. Şəki və Nardaran keramika və tətbiqi sənət mərkəzləri də öz fəaliyyətini uğurla davam etdirib. İl ərzində mərkəzlərdə xüsusi “YAŞAT” kolleksiyaları yaradılıb. Bu kolleksiyanın satışından əldə olunan gəlirin bir hissəsi “YAŞAT” Fonduna ianə edilir. Fond ilə bundan da başqa bir neçə istiqamətlər üzrə əməkdaşlıqlar qurulub. Onlardan biri şəhid ailələrinin üzvlərinin dekorativ-tətbiqi sənətə yiyələnib “ABAD”çı sıralarına qoşulmaqdır. Müvafiq dövrdə "ABAD” publik hüquqi şəxsi və Birləşmiş Millətlər Təşkilatının İnkişaf Proqramı (BMTİP) tərəfindən birgə icra edilən, o cümlədən Avropa İttifaqı (Aİ) tərəfindən maliyyələşdirilən “Balakən regional “ABAD” mərkəzi vasitəsilə Şəki-Zaqatala iqtisadi zonasında kiçik ailə təsərrüfatlarının inkişafına dəstək” layihəsi başa çatıb. 2017-2021-ci illəri əhatə edən layihənin nəticəsi olaraq 12 məcburi köçkün ailəsi olmaqla 44 yeni ailə təsərrüfatı formalaşıb, məhsulları satışa çıxarılıb. İl ərzində bir çox xarici dövlətlər tərəfindən “ABAD”a olan maraq artıb. Özbəkistan, İsrail, Argentina, Tacikistan, Rusiya və s. ölkələrin rəsmi nümayəndələrinə “ABAD” təqdimatı keçirilib, əməkdaşlığa dair müzakirələr aparılıb. “ABAD”ın AQTA ilə olan layihələrinin növbəti mərhələləri baş tutdu. Məsələn, "Dönər biznesinin sağlamlaşdırılması" layihəsi çərçivəsində iki iaşə obyektinin fəaliyyətinə start verilib. 2021-ci il “ABAD” üçün həmçinin bir çox sərgi və yarmarkalarda iştirakı ilə yadda qalıb. Onlar arasında Zəfər gününə həsr olunmuş tədbirlər və s.

06.01.2022

“ABAD” daha bir Yeni İl yarmarkasında

“ABAD” Şahdağ Turizm Mərkəzində təşkil olunmuş Milad yarmarkasında iştirak edir. 25 dekabr 2021-ci il tarixindən start alan yarmarkada "ABAD" brendi altında əl işləri suvenirləri, müxtəlif hədiyyələr və “ABAD”çıların istehsal etdiyi nəfis qida məhsulları və içkilər təqdim olunur. Qeyd edək ki, yarmarka 2022-ci ilin yanvar ayının ortalarınadək hər kəs üçün açıqdır.

27.12.2021

“ABAD” məhsulları “Kontakt Home”da

"ABAD" və "Kontakt Home" əməkdaşılığa əstart verdi.2021-ci ilin dekabrın 21-də elektronika, məişət texnikası, mebel, tekstil və digər ev əşyalarının satışı üzrə ixtisaslaşmış Azərbaycanın ən böyük riteyl şəbəkəsi olan “Kontakt Home”-un İnşaatçılar filialında "ABAD" stendinin açılışı baş tutdu.Burada Siz “ABAD”çıların əl işi olan keramika qab-qacaq dəstləri, tekstil, milli hədiyyə setləri, qurama, bədii oyma və s. kimi müxtəlif dekorativ-tətbiqi xalq sənətkarlığı texnikaları ilə hazırlanmış suvenirləri əldə edə biləcəksiniz.Ünvan: Şərifzadə küçəsi 174, İnşaatçılar metrosunun çıxışının yanı.“Kontakt “ABAD”la sevindirir!”

22.12.2021

“ABAD”ın direktor müavini sağlamlıq imkanları məhdud şəxslərlə görüşdə iştirak edib

Beynəlxalq Əlillər Günü münasibətilə dekabrın 4-də Yevlax KOB evində "Uğurumu özüm qazandım" layihəsinin təqdimatı və sosial həssas kateqoriyaya aid olan qadın sahibkarların əl işlərindən ibarət satış yarmarkası keçirilib. Yarmarkada digər agentliklər və ictimai birliklərlə birgə “ABAD” publik hüquqi şəxsin direktor müavini Vüsal Arzumanlı iştirak edib. O, görüşdə “ABAD” çərçivəsində əlilliyi olan şəxslərə göstərilən dəstək tədbirləri və layihələr barəsində ətraflı məlumat verib. Yarmarka Kiçik və Orta biznesin İnkişafı Agentliyinin (KOBİA) Ucar-Zərdab KOB İnkişaf Mərkəzinin təşkilatçılığı ilə Almaniya Beynəlxalq Əməkdaşlıq Cəmiyyətinin (GİZ) "Cənubi Qafqazda aztəminatlı məcburi köçkün və yerli əhalinin iqtisadi və sosial inkişafı" proqramının texniki dəstəyi çərçivəsində həyata keçirilir. Qeyd edək ki, bugünədək “ABAD”ın dəstəyindən 11 sağlamlıq imkanları məhdud olan şəxs bəhrələnərək “ABAD”çı sıralarına daxil olub.

16.12.2021

"ABAD" məhsulları Yaponiyada satışa çıxarılacaq

14 dekabr 2021-ci il tarixində “ABAD” publik hüquqi şəxsin Yaponiyanın “TET International Development” şirkəti ilə növbəti görüşü keçirilib. Sayca 5-ci olan bu görüşdə ”ABAD” PHŞ-nın direktoru Rüfət Elçiyev, TET International Development şirkətinin prezidenti Taro Savada, vitse prezidenti Namiq Ələsgərov və Azərbaycan Sahibkarlar Konfederasiyası prezidentinin məsləhətçisi Şəbnəm Nuriyeva iştirak edib.Görüş zamanı iki qurum arasında bu ilin əvvəlindən başlayan əməkdaşlıq yüksək dəyərləndirilib və davamı üçün növbəti addımlar müzakirə edilib. Həmçinin 2022-ci ilin 22 iyun – 24 iyun tarixlərində Yaponiyanın paytaxtı Tokio şəhərində baş tutacaq “II Beynəlxalq qida sərgisi”ndə “ABAD” məhsullarının sərgilənəcəyi təsdiqlənib.Qeyd edək ki, iki qurumun əməkdaşlığı çərçivəsində “ABAD”çıların məhsulları: ədviyyatlar, meyvə araqları və çiçək tozu Yaponiyaya ixrac olunub. Məhsullar və “ABAD”çılar haqqında ətraflı məlumatlar Azərbaycan mədəniyyəti və kulinariyasının Yaponiyada tanıdılması məqsədi ilə yaradılan https://azer-table.jp/ saytına yerləşdiriləcəkdir.

14.12.2021

“ABAD” Həştərxan vilayətinin Dövlət Məşğulluq Xidmətinə təqdim olundu

Rusiya Federasiyası Həştərxan vilayətinin höküməti yanında Əhalinin Məşğulluğu Agentliyinin rəhbəri Ramiz Əzizov ötən gün Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxsin qonağı olub.Görüşdə “ABAD” publik hüquqi şəxsin yaradılması məqsədləri və fəaliyyət istiqamətləri barədə ətraflı məlumat verilib. Qeyd olunub ki, mikro, kiçik və orta sahibkarlığın inkişafı baxımından “ABAD” modelinin yaradılması ilə bir çox nailiyyətlər əldə olunub.Bildirilib ki, “ABAD” bu günədək 502 sahibkara xidmət göstərib. Öz fəaliyyətində səmərəliliyi artırmaq məqsədi ilə qurum mütəmadi olaraq beynəlxalq qurumlar ilə əməkdaşlıq edir.Bundan başqa, görüşdə “ABAD” publik hüquqi şəxsin Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Məşğulluq Agentliyi ilə uğurlu əməkdaşlığı və birgə layihələri haqqında məlumat verilib.Sonda qonağa “ABAD”çı məhsulları ilə daha yaxından tanış olmaq məqsədi ilə “ABAD”ın 3 saylı Bakı “ASAN xidmət” mərkəzində fəaliyyət göstərən etno-butikində təqdimat və dequstasiya keçirilib.