Xəbərlər

"ABAD" “Smart Xanım” layihəsinə dəstək verəcək

Regionda yaşayan və öz biznesini qurmaq yaxud genişləndirmək istəyən xanımlar yeni “Smart Xanım” layihəsinə qoşula bilər. Layihə Qax, Zaqatala, Balakən, Gəncə, Tovuz, Şəmkir, Lənkəran, Masallı, Biləsuvar rayonlarında həyata keçirilir. Proqrama qoşularaq siz regionu tərk etmədən gələcəyin sahibkarı olmaq üçün fundamental baza biliklərə və ekspertlərə çıxış imkanı əldə edəcək, öz biznes ideyanızın real biznesə çevrilməsi üçün layihə üzərində real iş imkanı qazanacaqsınız. Proqramın sonunda qalib olan 3 ideyanın biznesə çevrilməsi üzrə dəstək təmin olunacaq. Layihə 4 mərhələdən ibarətdir: 1. "Kəşf et" - Regionlarda 1 günlük canlı tədbir (tanışlıq və izah üçün) 2. "Öyrən" - İnkişaf proqramı (online təlimlər, mentorlarla görüş) 3. "Tətbiq et" - Layihə üzərində iş (ideyanın layihəyə çevrilməsi üçün mentorlarla onlayn və fiziki görüşlər) 4. "Parla" - 3 günlük Bootcamp tədbiri (layihələr arasından dəstək üçün ən yaxşı 3 layihənin seçilməsi İştirakçıları nələr gözləyir: Layihəyə seçilən iştirakçılar yuxarı qeyd olunan mərhələlərdən keçəcəklər. Ümumilikdə, bu müddət ərzində onlayn təlimlər vasitəsilə sahibkar üçün lazım olan bilik və bacarıqlar mövzusunda məlumatlandırılacaq, biznes layihəsinin yazılması üçün mentor dəstəyi ediləcək, sonda ən uğurlu layihələrin həyata keçirilməsi üçün dəstək ediləcək və yaşadıqları regionlar üzrə biznes mühitə çıxış və şəbəkələşmə imkanı əldə edəcəklər. Layihəyə kim qoşula bilər: · 18 yaşdan yuxarı öz işini qurmaq motivasiyası olan istənilən qadın · qeyd olunana rayonların birində yaşamaq · tək yaxud qrup halında öz regionunda biznes yaratmaq yaxud mövcud biznesini təkmilləşdirmək istəyi olmaq Layihə Azərbaycan Respublikasının Prezidenti Yanında Vətəndaşlara Xidmət və Sosial İnnovasiyalar üzrə Dövlət Agentliyinin əsas tərəfdaşlığı ilə "ABAD" publik hüquqi şəxsin, İnnovasiyalar Mərkəzinin, Kənd Təsərrüfatı Nazirliyinin, Gənclər və İdman Nazirliyinin, Kiçik və Orta Biznesin İnkişafı Agentliyinin, Ailə, Qadın və Uşaq Problemləri üzrə Dövlət Komitəsinin, Gənclərin İnkişafı və Karyera Mərkəzinin dəstəyi ilə həyata keçirilir.Öz növbəmizdə "ABAD"çı-xanımlarımıza qoşulmağa dəvət edirik. Layihədə iştirak üçün qeydiyyat linki: https://forms.gle/y27uWDmvQgAcRHGU8 Əlaqə nömrəsi: +994 55 917 52 02; Email: smart.khanim2021@gmail.com Müraciət üçün son tarix 19 dekabr 2021-ci tarixidir. Instagram: https://instagram.com/smartnation.az?utm_medium=copy_link Facebook: https://www.facebook.com/smartnationaz-109658351541684/

07.12.2021

“ABAD” publik hüquqi şəxsin direktoru “Bakı Qida Hakatonu” nun münsiflər heyətinin üzvü olub

“AgriVision” layihəsi çərçivəsində 27-28 noyabr tarixlərində Avropa İttifaqının (Aİ) Azərbaycandakı Nümayəndəliyi, Gənc Avropa Səfirləri və Aİ-nin maliyyələşdirdiyi, Avrasiya Əməkdaşlıq Fondu və “Konstitusiya” Araşdırmalar Fondunun reallaşdırdığı hakaton təşkil edilib. Hakaton sağlam qidalanma vərdişlərinin təbliği, yerli qidaların istehlakına həvəsləndirmək və Azərbaycanda qida ilə bağlı problemlər üçün innovativ həllər yaratmaq məqsədi daşıyır. Ümumilikdə 55 nəfər olmaqla 13 komandanın yarışdığı hakatonda iştirakçılara dəstək üçün yerli və xarici təcrübəli mentorlar cəlb olunub. Qalibi aqrar xidmət və innovasiya sahəsində yüksək profilli ekspertlər daxil olmaqla dəvət olunmuş münsiflər heyətinin üzvləri seçiblər. Münsiflər sırasına “ABAD” publik hüquqi şəxsin direktoru Rüfət Elçiyev də qoşuldu. Qeyd edək ki, hakatonda birinci yerə layiq görülən MDU-nun gənc əməkdaşlarından ibarət Agrinova komandası 5000 avro qazanıb.

07.12.2021

"Quba ABAD Factory" qablaşdırma vasitələrinin istehsalı müəssisəsinin açılışı baş tutdu

Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva dekabrın 6-da "Quba ABAD Factory" qablaşdırma vasitələrinin istehsalı müəssisəsinin açılışında iştirak ediblər.“ABAD” publik hüquqi şəxsin direktoru Rüfət Elçiyev müəssisədə görülən işlər barədə məlumat verdi.Bildirildi ki, “ABAD Factory” bir neçə ildir, qubalı mikro və kiçik sahibkarlara qida istehsalı müəssisəsi kimi tanış idisə, artıq həm də qablaşdırma vasitələrinin istehsalı müəssisəsi kimi onlara yardımçı olacaq.Yerli sakinlər müəssisənin yerləşdiyi yeri uzun illər əsaslı təmirə ehtiyacı olan və istifadəsiz qalan binanın mövcudluğu ilə xatırlayırlar. Memarlıq elementləri qorunmaqla tamamilə yenilənən binada artıq kartondan müxtəlif qablaşdırma vasitələri, kağız və etiketlərin istehsalı, promo məhsulların hazırlanması, eyni zamanda, tullantı kağızların preslənməsi nəzərdə tutulur. Layihə “PASHA Holding” tərəfindən ayrılan qrant əsasında həyata keçirilib. Müəssisənin açılışı ilə ilkin mərhələdə 20, sonrakı mərhələdə isə 50 nəfərin işlə təminatı reallaşacaq.Qeyd olundu ki, bu müəssisə vasitəsilə həm “ABAD”çıların qablaşdırma vasitələrinə olan tələbatı ödəniləcək, həm də digər kiçik və mikro sahibkarların ehtiyacları qarşılanacaq.Xatırladaq ki, “ABAD” Prezident İlham Əliyevin 2016-cı ildə imzaladığı Fərmanla yaradılıb. Statistik göstəricilər onu deməyə əsas verir ki, “ABAD” fəlsəfəsi əsaslı reallaşmaqdadır. İlin 10 ayının yekununda “ABAD” 500 ailəyə dəstək göstərib. Nəticədə “ABAD”çıların minlərlə çeşiddə sənətkarlıq, kənd təsərrüfatı və digər növ məhsulları satışa çıxarılıb. Ümumilikdə 5,5 milyon manat dəyərində məhsulun “ABAD” vasitəsilə satışı həyata keçirilib.

07.12.2021

"ABAD" Tacikistanın dövlət qurumlarına təqdim olundu

Tacikistan Respublikasının Azərbaycan Respublikasındakı səfirliyinin təşəbbüsü ilə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə “Azərbaycanın bir pəncərə prinsipi ilə dövlət xidmətlərinin göstərilməsi və elektron idarəetmə üzrə qabaqcıl təcrübəsi” mövzusunda onlayn tədbir baş tutub.Tədbirin əsas məqsədi Tacikistanın dövlət qurumlarının effektiv dövlət xidmətlərinin göstərilməsi haqqında məlumatlandırılması və müvafiq istiqamətlər üzrə mümkün əməkdaşlıq perspektivlərinin müzakirəsi olub.Görüşdə həmçinin Azərbaycanda ailə biznesinə dəstək sahəsində “ABAD”ın rolu üzrə təqdimat keçirilib. Təqdimatı “ABAD” publik hüquqi şəxsin direktoru Rüfət Elçiyev aparıb.Qeyd olunub ki, Azərbaycan Respublikasında mikro, kiçik və orta sahibkarlığın inkişafı baxımından “ABAD” modelinin yaradılması ilə bir çox nailiyyətlər əldə olunub. Həmçinin bildirilib ki, “ABAD” bu günədək 500 sahibkara xidmət göstərib.

03.12.2021

"ABAD"ın dəstəyi ilə növbəti İT təlimləri başa çatdı

“ASAN Peşə” layihəsi çərçivəsində biliklərin və əhalinin məşğulluq səviyyəsinin artırılması, eyni zamanda regional iqtisadiyyatın inkişafında mühüm rol oynayacaq müxtəlif peşələrə sahiblənmək istəyən şəxslər üçün kurslar və təlimlər davam etdirilir. Belə ki, noyabrın 30-u 2021-ci il tarixində İmişli “ASAN Həyat” kompleksində "ABAD" təlimçiləri vasitəsi ilə 2019-2020-ci illər və 2020-2021-ci illər ərzində İT təlimlərində iştirak etmiş 52 nəfərə müxtəlif dərəcəli sertifikatlar təqdim olunub. İştirakçıları sertifikatlarla Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov, “ABAD” publik hüquqi şəxsin direktor müavini Vüsal Arzumanlı, “ASAN Könüllülük” Məktəbinin rəhbəri Cahangir Hacıyev və İmişli “ASAN Həyat” kompleksinin direktoru Elvin Məmmədov təltif etdilər.

02.12.2021

"ABAD”çıların sayı 500 oldu

“ABAD” publik hüquqi şəxsdə 500-cü “ABAD”çı qeydə alınıb. Yubilyar “ABAD”çı dekorativ-tətbiqi xalq sənətkarlığı sahəsində çalışan Bakı şəhər sakini İbrahimova Nərgiz Rafik qızıdır. O, milli üslubda dəri, yun, tekstil və s. təbii materiallardan kompüter, planşet, və smartfonlar üçün çantalar, müxtəlif klatçlar və cüzdan kimi gözəl və praktik əl işləri yaradır.500-cü “ABAD”çı İçərişəhər etno-butikində qurumun direktoru Rüfət Elçiyev tərəfindən təşəkkürnamə və simvolik hədiyyə ilə mükafatlandırılıb. N.İbrahimovanın məhsulları yaxın müddətdə “ABAD”ın etno-butiklərində təqdim olunacaq. Butiklərin ünvanları ilə bu linkdən tanış ola bilərsiniz.