1 iyun - Uşaqların Beynəlxalq Müdafiəsi Günü münasibətilə Nardaranda fəaliyyət göstərən “ABAD” Keramika və Tətbiqi Sənət Mərkəzində xüsusi tədbir həyata keçirilib. Tədbir çərçivəsində “Ümid Yeri” sığınacağında yaşayan uşaqlar üçün keramika sənəti və rəngkarlıq üzrə maraqlı və maarifləndirici ustad dərsləri (master klass) təşkil olunub.

Ustad dərslərinin əsas məqsədi uşaqların yaradıcılıq qabiliyyətlərinin inkişafına dəstək olmaq, onlara sənət vasitəsilə özlərini ifadə etmək imkanı yaratmaq və bu günü onların yaddaşında xoş xatirə kimi saxlamaq olub.

Nardaran “ABAD” Keramika və Tətbiqi Sənət Mərkəzinin peşəkar sənətkarları tərəfindən keçirilən bu yaradıcı məşğələlər zamanı uşaqlara keramika sənətinin əsasları, gil materialı ilə işləmə qaydaları və müxtəlif bədii formaların hazırlanması öyrədilib. Uşaqlar fərdi şəkildə gil məhsulları hazırlayıb və öz istedadlarını nümayiş etdiriblər.

Tədbirin sonunda uşaqlara keramikadan hazırlanmış əl işləri hədiyyə kimi təqdim olunub və uşaqlar üçün çay süfrəsi təşkil edilib.