News

“ABAD” 1-ci “Ailə və Evlilik” Sərgisində

23 oktyabr 2025-ci il tarixində PAŞA Events-in təşkilatçılığı ilə Bakı Ekspo Mərkəzində Qafqazda və Azərbaycanda ilk dəfə keçirilən 1-ci “Ailə və Evlilik Sərgisi”nin açılış mərasimi baş tutub. Sərginin əsas məqsədi ailə dəyərlərinin təşviqi, toy mərasimlərinin təşkili üçün lazım olan məhsul və xidmət sektorlarının bir araya gətirilməsi, eləcə də yerli istehsalın, dizaynın və yaradıcı bizneslərin tanıdılmasıdır. Tədbir həm istehlakçılar, həm də sahibkarlar üçün birgə əməkdaşlıq, təcrübə və müxtəlif yanaşmaların mübadiləsi baxımından geniş imkanlar yaradır. “ABAD” publik hüquqi şəxs sərgidə ölkənin müxtəlif bölgələrindən olan “ABAD”çı ailələrin əl işlərini, milli dekor və suvenir nümunələrini, həmçinin qida məhsullarını təqdim edib. “ABAD” stendi ziyarətçilər tərəfindən böyük maraqla qarşılanıb, qonaqlar həm məhsullarla tanış olub, həm də onların hazırlanma prosesi barədə ətraflı məlumat əldə ediblər. Qeyd edək ki, sərgi oktyabrın 25-dək davam edəcəkdir.

24.10.2025

“ABAD” və Özbəkistanın “Sahibkarlığın İnkişafı Şirkəti” Səhmdar Cəmiyyəti arasında görüş keçirilib

9 oktyabr tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxs və Özbəkistanın “Sahibkarlığın İnkişafı Şirkəti” Səhmdar Cəmiyyəti arasında qarşı tərəfin təşəbbüsü ilə ikitərəfli görüş keçirilib. Görüşdə “ABAD” publik hüquqi şəxsin direktoru Rüfət Elçiyev, Özbəkistanın Sahibkarlığın İnkişafı Şirkətinin direktoru Abbasxon Maxamatov və hər iki qurumun rəsmi nümayəndə heyəti iştirak edib. Görüşün məqsədi qurumlar arasında qarşılıqlı tanışlıq, fəaliyyət sahələri üzrə məlumat mübadiləsi aparmaq və əməkdaşlıq potensialını ümumi şəkildə dəyərləndirmək olub. Görüş çərçivəsində tərəflər təqdimatlarla çıxış edərək fəaliyyət istiqamətləri, layihələr və sosial-iqtisadi təşəbbüslər barədə məlumat veriblər. Tərəflər mikro, kiçik və orta sahibkarlığın inkişafı, ailə bizneslərinin dəstəklənməsi, innovativ yanaşmalar və sosial təşəbbüslərin təşviqi sahəsində təcrübələrini bölüşüblər. Şirkətin direktoru Abbasxon Maxamatov “ABAD”ın fəaliyyətini yüksək dəyərləndirərək onun sosial-iqtisadi inkişaf sahəsində təqdirəlayiq nümunə olduğunu vurğulayıb.

10.10.2025

Brendi-Konyak Günündə “ABAD” öz stendi ilə iştirak edib

4 oktyabr tarixində Göygöl şəhərində Heydər Əliyev adına Mədəniyyət və İstirahət Parkında “Göygöl Brendi-Konyak Günü” tədbiri keçirilib. Tədbir Göygöl Rayon İcra Hakimiyyətinin təşkilatçılığı, Aqrar İnnovasiya Mərkəzi, Dövlət Turizm Agentliyi və digər tərəfdaş qurumların iştirakı ilə baş tutub. Tədbirin məqsədi Göygölün qədim üzümçülük və şərabçılıq ənənələrinin qorunması, brendi və konyak mədəniyyətinin tanıdılması, yerli məhsulların və turizm potensialının geniş auditoriyaya təqdim olunması olub. “ABAD” publik hüquqi şəxs tədbirdə öz sərgi stendi ilə təmsil olunub. Stenddə dekorativ-tətbiqi xalq sənətkarlıq nümunələri – zərgərlik, taxta üzərində oyma, dulusçuluq, rəngkarlıq, toxuculuq və digər “ABAD”çı əl işləri ilə yanaşı, qida məhsulları və şərab çeşidləri də təqdim olunub. Bu məhsullar yerli və xarici ziyarətçilər tərəfindən böyük maraqla qarşılanıb. Tədbirin sonunda “ABAD” sertifikatla təltif olunaraq yerli sənətkarlığın və ailə təsərrüfatlarının dəstəklənməsi istiqamətində əhəmiyyətli təşəbbüslərdən biri kimi qiymətləndirilib.

06.10.2025

“ABAD” 9-cu ilini qeyd edib

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan "ABAD" publik hüquqi şəxsin yaradılmasının doqquzuncu ildönümü ilə əlaqədar tədbir keçirilib.Tədbirdə Dövlət Agentliyinin sədri Ülvi Mehdiyev qurum əməkdaşlarını bu münasibətlə təbrik edib, onlara gələcək fəaliyyətlərində uğurlar arzulayıb."ABAD" publik hüquqi şəxsin direktoru Rüfət Elçiyev qurumun doqquz illik fəaliyyəti ilə bağlı hesabat xarakterli çıxış edib. O bildirib ki, ötən il “ABAD”ın fəaliyyəti daha da genişlənib, işğaldan azad edilmiş ərazilərdə təqdimatlar keçirilib, bu bölgələrdən toplanan bal məhsulları brendləşdirilərək satışa çıxarılıb, ABŞ bazarına məhsul ixrac olunub. “Wolt Market” platformasında onlayn satış aktivləşdirilib, həmçinin beş yeni satış məntəqəsində “ABAD” məhsulları təqdim olunub. Bundan əlavə, müxtəlif yeni məhsul çeşidləri istehsal edilərək bazara çıxarılıb.Pilot layihə olaraq Masallıda 7 ailə ilə fəaliyyətə başlayan “ABAD” 9 illik fəaliyyəti ərzində 677 ailəyə dəstək olaraq öz şəxsi bizneslərini inkişaf etdirməsi üçün xidmət göstərib. Həmin sahibkarlardan 508 nəfər dekorativ-tətbiqi xalq sənətimizi canlandıran və qoruyan istedadlı sənətkarlardır. 144 “ABAD”çı isə keyfiyyətli və təbii qida məhsulları istehsal edir. Bundan əlavə, 25 sahibkar müxtəlif sahələrdə öz bizneslərini uğurla inkişaf etdirir.Tədbir çərçivəsində xidməti fəaliyyətində fərqlənən əməkdaşlar təşəkkürnamələrlə təltif olunublar.“ABAD” publik hüquqi şəxs Azərbaycan Respublikasının Prezidenti İlham Əliyevin 23 sentyabr 2016-cı il tarixli Fərmanı ilə yaradılıb və ötən doqquz il ərzində ailə əməyinə əsaslanan mikro, kiçik və orta sahibkarlığın inkişafı, məşğulluğun artırılması və regionlarda sahibkarların biznes fəaliyyətinin dəstəklənməsi istiqamətində mühüm işlər görüb.

23.09.2025

Şəki şəhərində “Sənətkarlıq diyarı” adlı mədəni tədbir keçirilib

5 sentyabr 2025-ci il tarixində Şəki “ABAD” Keramika və Tətbiqi Sənət Mərkəzində “Konstitusiya və Suverenlik İli” çərçivəsində “Sənətkarlıq diyarı” adlı mədəni-kütləvi tədbir təşkil olunub. Tədbir Şəki Şəhər İcra Hakimiyyətinin və “ABAD” publik hüquqi şəxsin təşkilatçılığı, Azərbaycan Dövlət Turizm Agentliyinin tərəfdaşlığı ilə reallaşdırılıb. Tədbirin əsas məqsədi qədim sənətkarlıq ənənələrinin yaşadılması, müasir dövrdə inkişaf etdirilməsi, yaradıcı insanların bir araya gətirilməsi və mədəni dəyərlərin təbliği olmuşdur. UNESCO-nun “Yaradıcı şəhərlər” şəbəkəsinin üzvü olan Şəki şəhərində keçirilən tədbir çərçivəsində “ABAD”çı sənətkarların “Konstitusiya və Suverenlik İli” mövzusunda hazırlanmış əsərlərindən ibarət sərgi təşkil edilmiş, müxtəlif sənət sahələrinin canlı nümayişləri ictimaiyyətə təqdim olunmuşdur. Qonaqlar Şəkinin zəngin tarixi-mədəni irsi ilə yanaşı, ölkənin müxtəlif bölgələrindən gələn sənətkarların yaradıcılıq nümunələrini də yaxından izləmək imkanı qazanıblar. Sonda tərəfdaş qurumlar və iştirakçı sənətkarlar qədim sənət ənənələrinin qorunması və təbliğindəki xidmətlərinə görə sertifikatlarla təltif olunublar.

08.09.2025

“ABAD” “YAŞAT” düşərgəsində ustad dərsləri keçirib

Lənkəran şəhərində keçirilən 4-cü “Yaşat” düşərgəsində “ABAD” publik hüquqi şəxsin dəstəyi ilə şəhid övladları üçün ustad dərsləri təşkil olunub.Düşərgə müddətində “ABAD” sənətkarları tərəfindən dekorativ-tətbiqi sənət, rəngkarlıq, ebru sənəti, keramika, dulusçuluq və digər sahələr üzrə interaktiv ustad dərsləri keçirilib. Gənc iştirakçılar bu dərslərdə milli sənətimizlə tanış olub, əl bacarıqlarını inkişaf etdirmək və yaradıcılıqlarını göstərmək imkanı qazanıblar.Qeyd edək ki, “YAŞAT” Fondunun təşkilatçılığı ilə şəhid övladları üçün mütəmadi olaraq düşərgələr, müxtəlif kurslar, layihələr və təlimlər təşkil edilir, onların yüksək səviyyəli təhsilinə dəstək göstərilir.