Xəbərlər

"ABAD"la JICA-nın növbəti görüşü baş tutdu

7 dekabr 2022-ci il tarixində “ABAD” publik hüquqi şəxs və Yaponiya Beynəlxalq Əməkdaşlıq Agentliyi (JICA) arasında növbəti görüş keçirilib.Görüş zamanı iki qurum arasında davamlı əməkdaşlıq yüksək dəyərləndirilib və atılacaq növbəti addımlar planlaşdırılıb. Əsas müzakirə mövzusu isə Agentliyin Mərkəzi Asiya ölkələrini əhatə edən “Bir kənd, bir məhsul” adlı layihəsi və bu layihənin “ABAD” publik hüquqi şəxs vasitəsi ilə Azərbaycanda tətbiqi ilə bağlı imkanlar olub.Əlavə olaraq isə, təcrübə mübadiləsi istiqamətində gələcək addımların atılması imkanları müzakirə olunub.Qeyd edək ki, bundan öncə iki qurumun əməkdaşlığı çərçivəsində 2018 və 2019-cu illərdə “ABAD” publik hüquqi şəxsin nümayəndələrinin Yaponiyaya təlim səfərləri baş tutub. Bundan başqa 2020-ci ildə “ABAD” Yaponiya Beynəlxalq Əməkdaşlıq Agentliyinin elan etdiyi “Kiçik Qrant Layihələri” müsabiqəsində iştirak edərək öz layihəsi ilə qalib seçilmişdir.

08.12.2022

Azərbaycanda ilk – yerli istehsal olan ADVENT TƏQVİM

Qloballaşma və kütləvi mədəniyyətin tirajlanması sayəsində biz başqa ölkə və xalqlara aid bir çox adət-ənənə və bayramları qeyd edirik. Advent təqvim də, həmçinin Yeni İl və Milad bayramının ayrılmaz bir hissəsidir.Advent təqvim nədir və necə işləyir?Advent təqvim Yeni İl əhvalı üçün ən güclü vasitədir. Bu təqvimlə Sizi, yaxud hədiyyə edəcəyiniz şəxsi Yeni İlə sayılı gün qalmışdan kiçik sürprizlər gözləyir. Ən böyük hədiyyə isə ilin ən vacib gecəsinə təsadüf edir.Yerli bazarda advent təqvimləriHazırda ölkəmizdə bir neçə növ təqvimlər satışdadır: yaradıcı, hədiyyəlik, şirniyyatlı, kosmetik və tematik. Bazar araşdırmaları zamanı təqvimlərin heç birinin yerli istehsal olmadıqları, müxtəlif xarici brendlər tərəfindən təqdim edildiyi bəlli oldu. Və bu “ilk”ə imzanı “ABAD” atdı.“ABAD” advent təqviminin özəllikləri“ABAD”çı İzzət Muxtarov tərəfindən təmiz taxtadan hazırlanmış təqvim 15 dekabr tarixindən başlayır. Hər siyirmə digər “ABAD”çılarımızın əl işləri ilə doldurulub. Bununla da, Siz bir təqvim əldə etməklə 17 müxtəlif “ABAD”çı ailəsinin məhsulunu əldə etmiş və 17 ailənin gəlirinə töhfə vermiş olursunuz. Çünki kiçik sahibkarın ən böyük dəstəkçisi Siz istehlakçılarsınız.Tələsin, məhsul məhdud saydadır.

30.11.2022

"ABAD" “Black Friday Event”-də iştirak edib

“ABAD” publik hüquqi şəxs 27 noyabr 2022-ci il tarixində Bakıda “T&S events” şirkətinin təşkilatçılığı ilə “Black Friday Event” əl işləri sərgisində iştirak edib.Burada “ABAD”ın milli suvenirlərindən və qida məhsullarından ibarət xüsusi stend sərgi qonaqlarının marağına səbəb olub. Həmçinin “ABAD”çı qida məhsullarının daddırması da uğur qazanıb.Qeyd edək ki, bu ilin sonunadək “ABAD”ın daha bir neçə Yeni İl yarmarkalarında tematik məhsullarla iştirakı nəzərdə tutulub.

28.11.2022

Qazaxıstanlı işgüzar xanımlar “ABAD”ın qonağı oldular

AQSİA – Azərbaycanda Qadın Sahibkarlığının İnkişafı Assosiasiyası tərəfindən Bakıda keçirilən “Qlobal Sahibkarlıq Həftəsi” çərçivəsində “Üfüqdə Yeni Fürsətlər: Qadın Sahibkarlara Yaşıl İşıq” adlı V Forum çərçivəsində Qazaxıstan Respublikasının İşgüzar Xanımlar İttifaqının 20-dən artıq üzvü Bakıya səfər edib.Səfər zamanı ittifaqla tərəfdaşlıq münasibəti quran “ABAD” publik hüquqi şəxs və ittifaqın nümayəndə heyəti arasında “İçərişəhər” Dövlət Tarix-Memarlıq qoruğu ərazisində yerləşən “ABAD” etno-butikində görüş baş tutub. Geniş təqdimat keçirilib, işgüzar xanımların sualları cavablandırılaraq, fikir mübadiləsi aparılıb.Bundan başqa, görüş əsnasında “ABAD” modelinin Qazaxıstan Respublikasında tətbiqi barədə geniş müzakirələr aparılıb.

23.11.2022

“ABAD” Gənc Sahibkarların III Forumunda təmsil olunub

Noyabrın 22-də “Gənclər paytaxtı” seçilmiş Tovuz rayonunda Gənclər və İdman Nazirliyi, Kiçik və Orta Biznesin İnkişafı Agentliyi və Gənclər Fondunun birgə təşkilatçılığı ilə Gənc Sahibkarların III Forumu baş tutub.Rəsmi açılışdan sonra baş tutan “Gənc sahibkarlara dövlət dəstəyi: imkanlar və çağırışlar” panel müzakirələrində “ABAD” publik hüquqi şəxsin də rəsmi nümayəndəsi iştirak edib. Dövlət dəstəyindən bəhs edərkən “ABAD” publik hüquqi şəxsin fəaliyyəti və sahibkarlıq ekosisteminə olan töhfələri haqqında təqdimat keçirilib. Daha sonra iştirak edən sahibkarlara “ABAD”ın regionda yaradılmış şəraiti haqqında geniş məlumat verilərək, sualları cavablandırılıb.Bundan başqa, III Forumda gənclər və idman naziri Fərid Qayıbov, Tovuz rayon İcra Hakimiyyətinin başçısı Məmməd Məmmədov, Gənclər Fondunun icraçı direktoru Fərid Cəfərov, Dövlət Məşğulluq Agentliyinin İdarə Heyətinin sədri Mustafa Abbasbəyli, Sahibkarlığın İnkişafı Fondunun İdarə Heyətinin sədri Osman Xaliyev də çıxış ediblər.Qeyd edək ki, Gənc Sahibkarların III Forumun keçirilməsində məqsəd gənclər arasında sahibkarlıq fəaliyyətinin təşviqi, mövcud dövlət dəstəyi mexanizmləri barədə onların məlumatlandırılması, yeni imkanlar və çağırışlar barədə fikir və təkliflərinin öyrənilməsidir.

23.11.2022

Nardaran “ABAD” Keramika və Tətbiqi Sənət Mərkəzinə mediatur təşkil edilib

31 oktyabr 2022-ci il tarixində Nardaran “ABAD” Keramika və Tətbiqi Sənət Mərkəzinə mediatur təşkil edilib.KİV nümayəndələrinin nəzərinə çatdırılıb ki, “ABAD” publik hüquqi şəxsin yaratdığı keramika mərkəzləri ölkəmizin, eləcə də regionun unikal bir yaradıcılıq platformasıdır.2018-2019-cu illərdə "PAŞA Holdinq"in dəstəyi ilə inşa edilən Nardaran "ABAD" Keramika və Tətbiqi Sənət Mərkəzi Türk Əməkdaşlıq və Koordinasiya Agentliyi ("TİKA") tərəfindən zəruri mal-material və avadanlıqlarla təchiz edilərək istifadəyə verilib.Mərkəzin məqsədi ölkəmizin tarixi keramika ənənələrinin gələcək nəsillərə ötürülməsi, Azərbaycan gilinin dünyada tanıdılması və gənclər arasında məşğulluğun artırılmasıdır.Mərkəzdə keramika sənəti üzrə ustad dərsləri və təlimlər keçirilir. Mərkəzin müxtəlif profilli avadanlıqla təchiz edilməsi digər keramika sənətkarları və həvəskarları üçün məhsulların bişirilmə və s. proseslərini ərsəyə gəlməsinə dəstək verir. Hazırda Mərkəzdə on əməkdaş daimi iş yeri ilə təmin edilib. Onlar tərəfindən hər ay yüzlərlə müxtəlif çeşidli məhsul istehsal edilərək satışa çıxarılır.Ölkəmizdə yeni brendlərin əsasının qoyulması “ABAD”ın ali məqsədlərindəndir. Belə ki, Mərkəzdə yaradılmış şəraitdən və “ABAD” xidmətlərindən yararlanmaqla “ART Factory” adlı yeni “ABAD”çı müəssisə formalaşıb. “ABAD”çı burada müxtəlif dekorativ əşya və suvenirlər, məişətdə istifadə üçün keramika məhsulları istehsal edir.