3D çapı yeni dövrün texnoloji inqilabi adlandırırlar. Bu avadanlıq sayəsində xırda avtomobil ehtiyyat hissəsindən tutmuş insan orqanlarınadək çap etmək mümkündür. Əlbəttə ki, suvenir istehsalı sahəsində 3D çapı öz sözünü deyir.

“ABAD”çı Adil Səfərov da bu tip format və printerlə işləmək biliklərinə malikdir:

“Bir ildən artıqdır 3D formatı ilə maraqlanırdım. Ümümdünya şəbəkəsində 3D formatlı xəritələr hazırlayırdım. Bu işimdən ilhamlanaraq Vətənim doğma Azərbaycanım üçün də 3D formatlı xəritə hazırladım. Daha sonra fikrimi daha da təkmilləşdirərək bu xəritəni printerdən çıxaraq masaüstü aksesuara çevirdim.”

Beləliklə, ərsəyə maraqlı bir suvenir çıxdı. İlk öncə A.Səfərov bu məhsulun onlayn satışlarını həyata keçirirdi. “ABAD” haqda məlumat əldə etdikdən sonra, məhsulun daha geniş auditoriyaya çatacağını hesablayaraq, “ABAD”a müraciət etdi:

“Müraciət zamanı mənə təqdim etdiyim suvenirin əl işi olduğunu sübüt etməmi tələb etdilər. Əlbəttə, 3d forması printerdən çıxır, lakin bunun epoksid qətranla boyaması, postamentinin hazırlanması təmiz əl işidir. Bununla da, “ABAD”çı oldum. Satışlarım və digər xidmətlərdən də çox razıyam.”

Qeyd edək ki, Adil Səfərovun epoksid və taxta materialların üzərində Azərbaycanın 3D xəritəsi olan masaüstü orqanazyerləri bütün “ABAD” etno-butiklərindən əldə edə bilərsiniz.