1970-ci il təvəllüdlü Arzu Məmmədov Gədəbəy rayonunda anadan olub. Əzim Əzimzadə adına Rəssamlıq məktəbinin, daha sonra isə İncəsənət Universitetinin Rəngkarlıq fakültəsinin məzunudur.

“Mən rəssamam, demək olar ki, rəssam doğulmuşam. Rəsm əsərlərimdən ibarət ilk sərgim hələ məktəb vaxtlarımda Pionerlər evində keçirilib. O zaman Azərbaycan dalğasında yeganə televiziya kanalı olan AzTV-də tez-tez rəssamlıq müsabiqələrdi keçirilib yayımlanırdı və mən, altıncı sinif şagirdi onlarda iştirak edərək müxtəlif yerlər tuturdum, bir çox mükafatlarla təltif olunurdum.”

A.Məmmədov dediyinə görə, sənətinin inkişafında ustadları xalq rəssamları Nadir Qasimov və Mikayıl Abdullayeva borcludur.

“Təhsilimi bitirdikdən sonra uzun illər neft şirkətinin Mədəniyyət evində təlimçi-rəssam kimi, sonra isə Tofiq İsmayılov adına yaradıcılıq mərkəzində müəllim kimi fəaliyyət göstərmişəm.”

Hazırda isə Arzu Məmmədov “ABAD”çıdır. “ABAD” etno-butiklərində Siz onun müxtəlif mövzularda və hətta müxtəlif texnikalarda hazırlanmış əl işlərini əldə edə bilərsiniz:

“Neft ilə çəkilmiş rəsm əsərlərim həm xarici turistlərdə, həm yerli əhali arasında böyük rəğbət qazanıb. Bundan başqa keramika işləri, qrafika və rəngkarlıq üzrə də əl işlərim satışa çıxarılır.”