Lalə Səmədova dekorativ-tətbiqi xalq sənətkarlığı sahəsində dəstək alan “ABAD”çıdır.  

Masallı rayonunda anadan olan Lalə xanım, turizm və otelçilik üzrə ali təhsil alıb. O, epoksi qətran vasitəsilə müxtəlif məhsullar hazırlayır və bu sənət növü ilə tanışlığı barədə belə deyir:

"İlk dəfə şəffaf mayedən hazırlanan təsbehlərlə qarşılaşanda onların gözəlliyi çox diqqətimi çəkdi və onların hazırlanma qaydası barədə xarici mənbələrdə araşdırmalara başladım. İlk dəfə, qəlibim olmadığı üçün məhsulları şirniyyat qəlibində hazırlamışdım. İlk sifarişim isə epoksidən külqabı və domino oldu". 

Lalə xanım, 2019-cu ildə məhsullarının daha böyük kütləyə tanıdılması istəyi ilə "ABAD"a müraciət edib. Onun bu sahə ilə bağlı arzularından biri “ABAD”la birgə yaratdığı brendini inkişaf etdirmək, eyni zamanda bu sahədə bildiklərini öyrətmək üçün kurslar təşkil etməkdir.

Qeyd edək ki, Lalə Səmədovanın əl işlərini “ABAD” etno-butiklərindən əldə edə bilərsiniz.