Bakı şəhər sakini, “ABAD”çı Həziyeva Lalə ilk ali təhsilini jurnalistika sahəsində alsa da, sonradan öz arzusunun arxasınca gedərək Azərbaycan Dövlət Rəssamlıq Akademiyasının Dizayn fakültəsinə daxil olur və buranı fərglənmə ilə bitirir.

“Uşaq yaşlarımdan rəssamlığa meylli olmuşam, mən daim müxtəlif geyim eskizləri çəkirdim. Məhz özümü bu sahədə gördüyümə görə də, ikinci təhsil almağa qərar verərək Rəssamlıq Akademiyasına daxil oldum. Mən incəsənət adamıyam.

Akademiyanı bitirdikdən sonra isə öz işimi qurdum. Mən keramika üzərində rəsmlər, portret tabloları çəkirəm və həm də tələblərim var. İşlərimi onlayn formada satışa çıxarıram və bir il öncə “ABAD” barədə eşitdim və fəaliyyəti ilə maraqlanmağa başladım.

Beləliklə, “ABAD”çı olmaq üçün müraciət göndərdim və lazımi prosedurlardan keçdikdən sonra “ABAD”çı kimi fəaliyyətə başladım. “ABAD” mənim inkişafıma bir növ təkan verdi, mən öz işimdə daha da peşəkarlaşdım. Artıq mən sadəcə ölkədaxilində deyil, həm də xaricdən sifarişlər alıram. “

Gələcək planları barədə danışan Lalə xanım bildirdi ki, o öz qalereyasını açmaq və bununla yanaşı əl işlərinin dünyada tanındığını görmək arsusundadır.