Azərbaycan Dövlət İqtisad Universiteti və Odlar Yurdu Universitetinin tələbələrinə “ABAD” publik hüquqi şəxsin təqdimatı keçirilib.

Tədbirdə “ABAD”ın əməkdaşları, Azərbaycan Sahibkarlar Konfederasiyasının (ASK) nümayəndəsi və 4-cü kurs iqtisadiyyat yönümlü təhsil alan tələbələr iştirak edib.

Maraqlı və ətraflı təqdimatla yanaşı, tələbələrin sualları cavablandırılıb, müzakirələr aparılıb.
Görüşdə vurğulanıb ki, “ABAD”ın mərkəzlərində, istehsalat komplekslərində, məktəbləri və satış məntəqələrində istehsalat təcrübəsini keçmək mümkündür.

Bundan başqa, “ABAD” çərçivəsində sahibkarlıqla məşqul olmaq istəyən tələbələrə, “ABAD”çı olmaq təklifi irəli sürülüb.

“ABAD”ın nümayəndələri ASK və yerli ali təhsil ocaqları ilə əməkdaşlığın gələcəkdə də davam etdiriləcəyini, daha böyük miqyaslı birgə layihələrin planlaşdırıldığını bildiriblər.

Qeyd edək ki, Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində “ABAD” publik hüquqi şəxs Prezident İlham Əliyevin 2016-cı il 23 sentyabr tarixli Fərmanı ilə yaradılıb. Ölkəmizin sosial-iqtisadi inkişafında kiçik və orta sahibkarlığın fəaliyyətinə, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək verməklə sosialyönümlü layihələr həyata keçirən “ABAD” PHŞ (Ailə Biznesinə Asan Dəstək) dekorativ-tətbiqi xalq sənətkarlığı və qida məhsullarının istehsalı sahəsində fəaliyyət göstərən ailə bizneslərinə dəstək layihələri həyata keçirilir.