24 aprel tarixində Quba “ASAN həyat” kompleksində fəaliyyət göstərən və maddi-texniki təchizatı "Paşa Holdinq"in dəstəyi ilə təmin edilən “ABAD” Məktəbi vasitəsi ilə milli zərgərlik üzrə peşə təlimlərini uğurla başa vuran gənclər sertifikatla təltif olunublar.

Təlimlər zamanı tələbələr dekorativ-tətbiqi xalq sənətkarlığı üzrə işləyən rəssam və ustadların əl işləri ilə tanış olub, zərgərlik sənətinin tarixçəsini öyrənib, habelə metalın bədii emalında istifadə olunan texnoloji yeniliklər haqqında ətraflı məlumat əldə ediblər. Tədrisdə zərgərlik sahəsini öyrənən tələbələr yalnız metal deyil, həmçinin digər material və alətlərlə tanış olub, müxtəlif zərgərlik texnikaları üzrə biliklərə də yiyələniblər.

Quba “ABAD” Məktəbində zərgərlik təlimlərini bitirən şəxslər peşakar fərdi fəaliyyəti üçün sertifikat əldə etməklə yanaşı, eyni zamanda “ABAD”la müqavilə bağlayaraq məhsullarını hazırlayıb “ABAD” etno-butiklərində satışa çıxarmaq imkanı da əldə etmiş olurlar.

Qeyd edək ki, təlimlər peşəkar "ABAD"çı-zərgərlər tərəfindən tam təmannasız olaraq keçirilir.