Aygün Nağıyeva Bakı şəhəri sakinidir. Uşaq yaşlarından incəsənətə marağı olan Aygün xanım ixtisasca İngilis dili müəlliməsidir.  

“Dekorariv-tətbiqi xalq sənətkarlığına maraq övladlarımın idman uğurlarından qaynaqlanıb. Oğlum karate üzrə Dünya və Avropa çempionudur. İlk olaraq yarışa gedərkən öz köynəyimin üzərində Azərbaycan bayrağını kristallarla bəzəmişdim və bu da hər kəsin marağına səbəb olmuşdu. Daha sonra tədricən bu işlərimi tablolar üzərində etməyə başladım.”

A.Nağıyevanın elə ilk əl işləri sərgidə nümayiş etdirilərək, nominasiyalar üzrə 1-ci və 2-ci yerlərə layiq görüldü. 2018-ci ildə “İlin Rəssamı” adına laiq görülüb. Və, dediyinə görə, hər bir uğur ona yeni əsərlər yaratmağa motivasiya edir.

“Ən böyük uğurlarımdan biri Türkiyə cumhurbaşkanı sayın Rəcəb Tayyib Ərdoğanla protokol əsasında iki dəfə görüşüm və Azərbaycanı təmsil edən bir rəssam olaraq əl işlərimi ona hədiyyə verməyim olub. 2021-ci il noyabır ayının 25-i Rəssamlar İttifaqında Kəlbəcərin işğaldan azad olunmasının birinci ildönümünə həsr olunmuş “Qarabağa ithaf” adlı fərdi yaradıcılıq sərgimi də uğur hesab edirəm. Əlbəttə, dekorativ-tətbiqi sənət rəssamı olaraq bu məni çox qürurlandırdı. Mənim əsərlərim həm də təbliğat rolunu oynayır.”

Aygün Nağıyeva onu da qeyd edir ki, o, Azərbaycanın milli dəyərlərini və tarixini əsərlərində əks etdirərək onları həm yaşatmaq, həm də təbliğ etməyə çalışır. Bu yönümdə, məsələn, Qarabağ xalçaçılıq məktəbinə aid olan xalça motivlərini kristallara düzəldib hədiyyəlik suvenir kimi hazırlayıb.

“Bu həm yenilik, həm də fərqlilik. Bildiyiniz kimi xrustal şüşələrdən qaşlar dəyərli olduğu üçün ərsəyə gətirdiyim əsərlərin qiyməti də yüksək olur. Bu səbəbdən düşündüm ki, mütləq satışlar həyata keçirim ki, yeni əl işləri yaratmağa imkanım olsun. İlk başda fiziki şəxs olaraq fəaliyyətə başladım və ətrafımdakı insanlar mənə sifariş verərək dəstək oldular. Bundan sonra işlərimi daha geniş şəkildə və dövlət qurumları vasitəsilə həyata keçirmək üçün “ABAD”a müraciət etdim. Onlarda öz növbəsində işlərimi bəyənərək mənə dəstək oldular.”

Aygün Nağıyevanın ən böyük arzusu isə Qarabağ kolleksiyasının Şuşa şəhərində sərgisini keçirməkdir:

“Ümid edirəm Qarabağa ziyarət edəcək hər bir turistin bu kollekiyaya marağı sonsuz olacaq və oradan bir xatirə olaraq öz evlərinin, ofislərinin bir guşəsində qoruyub saxlayacaqlar.”