Xəbərlər

"ABAD"ın fəaliyyəti Malaziyada təqdim olunub

14-25 iyul 2019-cu il tarixində Malayziya Texniki Əməkdaşlıq Proqramı (MTCP) və Malaziyanın Xarici İşlər Nazirliyinin təşəbbüsü, Kənd İnkişafı İnstitutunun (INFRA) təşkilatçılığı ilə "İnkişaf etməkdə olan kiçik ada ölkələri və Asiya üçün davamlı kənd təsərrüfatının inkişafı" kursu keçirilib. Məqsəd Asiya və inkişaf etməkdə olan kiçik ada ölkələrinin dövlət nümayəndələrini Malayziyanın kənd təsərrüfatının inkişafı istiqamətində görülən işlər, nailiyyətlər, tətbiq olunan metodik proqramlar, innovasiyalarla tanış etmək və təcrübə mübadiləsi aparmaqdır. Kursda Banqladeş, Samoa, Şri-Lanka, Vyetnam, Konqo, Filippin, Qırğızıstan, Kamboca ilə yanaşı Azərbaycan da təmsil olunub. İnformativ və praktiki sessiyalarla yanaşı iştirakçılar Malayziyanın Kənd Təsərrüfatının İnkişafı və Xarici işlər nazirlikləri, Putra Malayziya Universiteti və digər yerli qurumlarla tanış olublar, yerli kiçik sahibkarlarla fikir mübadiləsi aparılıb. Kurs çərçivəsində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ASAN xidmət” mərkəzləri və “ABAD” publik hüquqi şəxsin fəaliyyəti və mexanizmi ilə bağlı geniş məlumat verilib, “ABAD” haqqında xüsusi təqdimat gerçəkləşib və iştirakçıların sualları cavablandırılıb.

26.07.2019

“ABAD” və Qazaxıstan Respublikasının Türkistan vilayəti əməkdaşlıq edəcək

5 iyul tarixində Bakı şəhərində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxs və Qazaxıstan Respublikasının Türkistan vilayətinin icra hakimiyyəti arasında Niyyət protokolu imzalanıb.Protokol “ABAD” publik hüquqi şəxsin direktoru Rüfət Elçiyev və Türkistan vilayətinin icra hakiminin müavini Meirjan Mirzaliyev arasında imzalanıb.Sənəd Azərbaycanın “ABAD” modeli əsasında Qazaxıstan Respublikasının Türkistan vilayətində sənətkarlıq sahəsi üzrə mikro və kiçik sahibkarlığın daha da inkişaf etdirilməsi məqsədini nəzərdə tutur.Xatırladaq ki, “ABAD” – Ailə Biznesinə ASAN Dəstək – 2016-cı ildən həmçinin dekorativ-tətbiqi xalq sənətkarlığı ilə məşqul olan mikro kiçik və orta sahibkarlara dəstək göstərir. Bugünədək ABADçı-sənətkarların sayı artıq 300-ü ötüb. Sənətkarların əl işlərinin satışı üçün ölkənin fərqli coğrafi ərazilərində 9 etno-butik fəaliyyət göstərir. Burada Azərbaycanın milli ruhunu özündə daşıyan müxtəlif məmulatlar əldə etmək mümkündür. Dekorativ-tətbiqi xalq sənətkarlığı istiqamətində özünü təkmilləşdirmək istəyən şəxslər üçün isə Respublika üzrə “ABAD” Məktəbləri fəaliyyət göstərir.Qeyd edək ki, Turkistan – Böyük İpək Yolu boyunca yerləşən tarixi ərazi olmaqla yanaşı, həmçinin türk dünyasının mənəvi paytaxtı hesab olunur. 2019-cu ilin sonunadək Türkistan vilayətində Böyük İpək Yolunun Ənənəvi Sənətkarlıq Mərkəzinin açılması nəzərdə tutulur. Layihəyə əsasən, mərkəzdə Türk dünyasını təmsil edən sənətkarlar orada yaşayaraq öz peşələri üzrə fəaliyyətlərini davam etdirəcəklər. Niyyət protokolu bu və digər layihələrdə “ABAD” və Türkistanın Böyük İpək Yolu Ənənəvi Sənətkarlıq Mərkəzi arasında təcrübə mübadiləsini nəzərdə tutur.

05.07.2019

Beynəlxalq Keramika Simpoziumu başa çatıb

Şəki “ABAD” Keramika və Tətbiqi Sənət Mərkəzində təşkil olunan “Təbiətdən tarixə” adlı Keramika üzrə Beynəlxalq Simpoziumun bağlanış mərasimi baş tutub.Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Şəki Şəhər İcra Hakimiyyətinin başçısı Elxan Usubov, Dövlət Turizm Agentliyinin sədri Fuad Nağıyev, “ABAD” publik hüquqi şəxsin direktoru Rüfət Elçiyev, Şəki “ABAD” Keramika və Tətbiqi Sənət Mərkəzinin kuratoru Mir Teymur Məmmədov və Simpoziumun türkiyəli iştirakçısı Serap Ünel çıxış ediblər. Rəsmi hissədən sonra 15 ölkədən 25 iştirakçı sertifikatlarla təltif olunub. Sonda “Yanar heykəl” keramika şousu təqdim olunub. “ABAD” publik hüquqi şəxsin təşəbbüsü və "Paşa Holdinq"in dəstəyi ilə 20 may - 2 iyun tarixində təşkil olunan beynəlxalq Simpoziumun məqsədi müxtəlif ölkələrdən olan sənətkar-keramistlər ilə təcrübə mübadiləsi aparmaq, iştirakçıları və ziyarətçiləri keramika sənətinin müasir meylləri və milli mədəniyyətimiz ilə tanış etmək olub.

03.06.2019

Beynəlxalq Simpoziumun iştirakçıları “ASAN xidmət”də

31 may 2019-cu il tarixində "Təbiətdən Tarixə" adlı Keramika üzrə ilk Beynəlxalq Simpoziumun iştirakçıları Şəki “ASAN Həyat” kompleksi ilə tanış olublar.Qonaqlara “ASAN xidmət” mərkəzlərinin yaradılması məqsədləri və fəaliyyət istiqamətləri barədə ətraflı məlumat verilib. Qeyd olunub ki, şəffaflığın artırılması və müasir innovasiyaların tətbiqi baxımından “ASAN xidmət”in yaradılması ilə səmərəli dövlət idarəçiliyinin təmin edilməsi sahəsində ciddi nailiyyətlər əldə olunub.Bildirilib ki, ”ASAN xidmət” Birləşmiş Millətlər Təşkilatının 2015-ci il Dövlət Xidmətləri Mükafatına layiq görülüb.Qonaqlar, həmçinin kompleksdə yerləşən “ABAD”ın sərgi salonu, “ASAN Peşə” mərkəzi, kinoklub ilə tanış olub, ASAN könüllüləri ilə görüşüblər.“ABAD” publik hüquqi şəxsin təşkilatçılığı və "Paşa Holdinq"in dəstəyi ilə Şəki "ABAD" Keramika və Tətbiqi Sənət Mərkəzində "Təbiətdən Tarixə" adlı Keramika üzrə ilk Beynəlxalq Simpozium keçirilir. 14 xarici ölkədən 25 iştirakçının qatıldığı Simpozium 2 iyun tarixinədək davam edəcək.

31.05.2019

"ABAD" Keramika Simpoziumuna dair media-tur təşkil etdi

May ayının 25-i “ABAD” publik hüquqi şəxs tərəfindən və "Paşa Holdinq"in dəstəyi ilə Şəki Keramika və Tətbiqi Sənət Mərkəzində hazırda keçirilən “Təbiətdən Tarixə” adlı Keramika üzrə Beynəlxalq Simpoziumun iştirakçıları və ümumi iş prosesi ilə yaxından tanışlıq məqsədi ilə media nümayəndələri üçün press-tur təşkil olunub.Şəki Keramika və Tətbiqi Sənət Mərkəzinin kordinatoru Mir Teymur Məmmədov media nümayəndələrinə Simpoziumun məqsədi və beynəlxalq iştirakçılar barədə ətraflı məlumat verib.Qeyd olunub ki, Simpoziumun açılışı may ayının 21-i baş tutub və tədbirdən dərhal sonra sənətkarlar müxtəlif formalı keramika nümunələri üzərində çalışmağa başlayıblar:“Burada iştirak edən keramistlər öz peşələrində üzrə kifayət qədər öz sözünü demiş sənətkarlardır. 14 xarici ölkədən olan 22 iştirakçı Keramika mərkəzində iki həftə ərzində birgə çalışacaqlar. Simpoziumun keçirilməsində məqsəd təcrübə mübadiləsi aparmaq, keramika sənətinin müasir sahələri ilə tanış olmaq, Azərbaycanı Sənətkarlar diyarı kimi təqdim etmək, qədim Şəkidə digər sənətlərdən başqa keramikanın da inkişafı barəsində dünyaya səs salmaqdır”.Sonra media nümayəndələri iştirakçılarla daha yaxından tanış olaraq, onların sənətləri barəsində, tədbir və burada yaradılmış şərait haqqında geniş müsahibələr alıblar.Media-tur Şəki Keramika və Tətbiqi Sənət Mərkəzində təşkil olunmuş “Raku Keramika” şousu ilə başa çatıb.Qeyd edək ki, adıçəkilən Simpozium iyun ayının 2-nə kimi davam edəcək.

27.05.2019

Şəkidə Beynəlxalq Keramika Simpoziumun açılış mərasimi baş tutdu

May ayının 21-i Şəki "ABAD" Keramika və Tətbiqi Sənət Mərkəzində "Təbiətdən Tarixə" adlı Keramika üzrə ilk Beynəlxalq Simpoziumun açılış mərasimi baş tutub. Tədbiri giriş nitqi ilə Şəki rayonu icra başçısı Elxan Usubov açıb. O, qonaqları salamlayaraq Şəkinin qədim və zəngin tarixi haqqında məlumat verib. "ABAD" publik hüquqi şəxsin direktoru Rüfət Elçiyev öz çıxışında tədbirin məqsədləri və Azərbaycan keramika ənənələrinin dünyada tanınması üzrə görüləcək işlər haqqında danışıb. Rüfət Elçiyev nitqinin sonunda Simpoziumun iştirakçılarına uğurlar arzu edib. Bundan sonra "Təbiətdən Tarixə" adlı Keramika üzrə Beynəlxalq Simpoziumun kuratoru Mir Teymur Məmmədov Simpoziumu açıq elan edərək 15 ölkədən olan 25 iştirakçını qonaqlara təqdim edib. Tədbirin sonunda Şəki şəhəri uşaq incəsənət məktəbinin rəqs qrupunun çıxışları ilə davam etdi. Qeyd edək ki, "Paşa Holdinq"in dəstəyi ilə təşkil edilən "Təbiətdən Tarixə" adlı Keramika üzrə Beynəlxalq Simpozium iyun ayının 2-dək davam edəcək. İki həftə ərzində iştirakçı-keramistlər Şəki "ABAD" Keramika və Tətbiqi Sənət Mərkəzində açıq səma altında heykəltaraşlıq kompozisiyaları yaradacaqlar.