“ABAD” publik hüquqi şəxsin ilk növbədə ölkədə sahibkarlığın inkişafına köklənib. Buradan dəstək alan “ABAD”çı öncə sahibkar, sonra isə müvafiq olaraq sənətkar, fermer və s. olmalıdır.

Sahibkar-xanımlarımızdan biri də Aytən Yüzbaşovadır. Bakı Dövlət Universitetinin Beynəlxalq əlaqələr fakültəsinin məzunu olan Aytən xanım uzun müddətdir ki, bir neçə sahə üzrə öz işini qurub. İki ildir ki, bu sahələrə milli suvenirlərlə ticarət də daxildir.

İdeya necə yarandı?

“Bir gün mənə milli üslubda bəzədilmiş çay dəstgahı hədiyyə etdilər. O qədər bəyəndim ki, özümə kişik bir kolleksiya yığmağı düşündüm. Məhsul axtarışında tanışlarıma üz tutdum və iki rəssam mənə öz əl işlərini təqdm etdi. Söhbət əsnasında onların işində yaranan problemlərdən agah oldum və nir menecer kimi öz xidmətlərimi təklif etdim. Beləcə kiçik bir iş birliyi və MMC yarandı. Sonra bu birliyə daha bir rəssam-xanım daxil oldu”.

İş prosesi necə baş tutur?

“Mən bazar araşdırmalarını görürəm və onun nəticələrinə uyğun dizayn və məshullar seçirəm. Rəssamları xammal ilə təmin etdikdən sonra məhsul hazırlanır və mən onları “ABAD”a, digər partnyorlarıma və yaxud sifarişçiyə təhvil verməyi təmin edirəm. Əlbəttə ki, bir hüquqi şəxs kimi rəssamların hər ay məvacibini də ödəyirəm”.

“ABAD”la iş birliyi

“Məhsullar arasında ən çox satılan bəzədilmiş armudu stəkan və boşqab setləri olduğu səbəbindən ən çox təqdim etdiyimiz məhsullar da elə bunlardır. Satışlarımdan razıyam, hətta mənim üçün xoş təəcüblü bir məqam o oldu ki, hətta sərt karantin zamanı “ABAD”dan gələn gəlir qənaətbəxş edib”.

Gələcək planlar

“Planlarım da elə bu işin inkişafı ilə bağlıdır. İmkan yaranarsa rəssamların sayını artıraraq bir mərkəz yaratmaq istəyərdim. Ora həm emalatxana, həm tədris-təlim, həm şourum kimi fəaliyyət göstərərdi".