Dekorativ-tətbiqi xalq sənətkarlığın bir növü də Təzhib sənətidir. Təzhib xəttatlıq sənətinin ətrafını bəzəmək məqsədilə istifadə edilmiş, günümüzdə tək başına rəsm nümunəsi kimi də təqdim edilir. Bu əsasən üslublaşdırılmış bitki formaları, ya da müxtəlif dizaynlardan ibarət olan simmetrik əsərlərdir.

“ABAD”çı Güncamal Orucova da müzəhhibədir. O zaman içində unudulmuş, tərk edilmiş bu zərif və çətin sənətlə artıq səkkiz ildir ki məşquldur.

Güncamal xanım Qubadlı rayon Xanlıq kəndində anadan olub. 13 yaşında ailəsi ilə məcburən Bakı şəhərində məskunlaşıb. Azərbaycan Dövlət Pedoqoji Universitetinin Peşə təlimi ixtisası üzrə məzundur. Qubadlı rayon K.Mirzəyev adına 1 saylı Xanlıq kənd orta məktəbində Texnologiya fənnini tədris edir.

“Təzhib sənətin vurğunuyam. Bu sənət ilə islam dini kitablarında rastlaşıb daha dərindən öyrənməyə qərar verdim.  Əvvəl əl işlərimi yalnız dostlar, tanışlara hədiyyə edirdim. Lakin sənətimi daha geniş kütləyə çatdırmaq, sərgilər təşkil etmək, bu sənət üzrə tələbələr yetişdirmək istəyi məndə günü gündən artırdı. Qardaşımın məsləhəti ilə “ABAD”a qoşuldum. Və artıq məqsədlərimin bir neçəsi mərhələli şəkildə gerçəkləşməyə başladı.”

Qeyd edək ki, Güncamal Orucovanın əl işləri ilə “ABAD” etno-butiklərində tanış ola bilərsiniz.