Xəbərlər

Şimali Makedoniya “ABAD” təcrübəsini öyrənir

27 – 30 iyun 2022-ci il tarixində Şimali Makedoniyanın informasiya cəmiyyəti və administrasiya naziri Admirim Alitinin başçılıq etdiyi nümayəndə heyəti ölkəmizə səfər edib. Məqsəd “ASAN xidmət” modeli və Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən rəqəmsal hökumət və sosial innovasiyalar sahəsində həyata keçirilən layihələr ilə yaxından tanış olmaq, eləcə də gələcək əməkdaşlıq barədə yol xəritəsinin hazırlanması, hüquqi çərçivənin yaradılması, həmçinin ölkəmizin qabaqcıl modeli olan “ASAN xidmət”in Şimali Makedoniyada tətbiqi istiqamətində müzakirələrin aparılması olub. Səfər çərçivəsində nümayəndə heyəti Dövlət Agentliyinin sədri Ülvi Mehdiyev ilə görüşüb. Ülvi Mehdiyev qonaqlara “ASAN xidmət” mərkəzlərinin yaradılması məqsədləri və fəaliyyət istiqamətləri barədə məlumat verib. Cənab sədr nümayəndə heyətini həmçinin “ABAD”ın fəaliyyəti ilə tanış edib. Qeyd olunub ki, əsas məqsədi ölkənin sosial-iqtisadi tərəqqisində vətəndaşların fəal iştirakını, kiçik və orta sahibkarlığın inkişafını, əhalinin məşğulluq səviyyəsinin artırılmasını təmin etmək olan “ABAD” rəqabətqabiliyyətli ailə təsərrüfatlarının formalaşdırılmasına dəstək verir, sosialyönümlü layihələrin həyata keçirilməsində birbaşa iştirak edir. Görüş sonunda Dövlət Agentliyinin sədri Ülvi Mehdiyev Şimali Makedoniyanın informasiya cəmiyyəti və administrasiya naziri Admirim Alitini “ABAD”çıların əl işi Azərbaycan milli-mədəniyyətinə xas olan suvenir hədiyyə edib.

30.06.2022

“ABAD” məhsulları Yaponiyada sərgidə təqdim edildi

“ABAD” publik hüquqi şəxs ilk dəfə olaraq Yaponiyada “Food Expo Fair-2022” ( JFEX-2022) beynəlxalq sərgisində iştirak edib. Sərgi Tokionun möhtəşəm “Big Sight” sərgi salonunda üç gün ərzində (22–24 iyun 2022-ci il) keçirilib.“ABAD” məhsulları sərgidə Yaponiyanın “TET International Development Co.LTD” şirkətinin dəstəyi ilə təqdim olunub. Burada “ABAD”çıların istehsal etdiyi cürbəcür təbii əzmələri, yağları, ədviyyatları, balları, spirtli içkiləri, sousları, unları və s. məhsulları sərgi iştirakçıları tərəfindən böyük maraqla qarşılanıb.Bundan başqa, sərgidə ölkəmizin “Made in Azerbaijan” brendi ilə tanınan digər yüksəkkeyfiyyətli, xüsusi orqanik məhsulları Asiya regionunun şirkətlərinə təklif olunub.Qeyd edək ki, “JFEX-2022” beynəlxalq sərgisi Asiya regionunun qida məhsulları və içkilər üzrə ən böyük sərgilərindən biri hesab edilir.

29.06.2022

"ABAD" Yanardağda festivalın tərəfdaşlarından biri kimi çıxış etdi

15 iyun - Milli Qurtuluş Günü ilə əlaqədar Yanardağ Dövlət Tarix-Mədəniyyət və Təbiət Qoruğunda “Milli İrs" adlı tədbir keçirildi.Tədbirdə “ABAD” publik hüquqi şəxs dekorativ tətbiqi xalq sənət növlərinin, o cümlədən zərgərlik, taxta üzərində oyma, dulusçuluq, rəngkarlıq, toxuma və s. suvenirlərin nümayişi ilə iştirak etdi. Burada “ABAD”çıların əl işlərinin satış-sərgisi və həmçinin Nardaran “ABAD” Keramika və Tətbiqi Sənət Mərkəzinin sənətkarları tərəfindən maraqlı master klasslar keçirildi.

20.06.2022

“ABAD”ın yeni etno-butiki Şərq Bazarında

6 iyun 2022-ci il tarixində “Paşa Holding”in dəstəyi ilə yenicə restavrasiya edilmiş Şərq Bazarında “ABAD”ın sayca 12-ci etno-butikinin açılışı baş tutdu. Açılış zamanı ölkə prezidenti və birinci xanım "ABAD"ın fəaliyyətə başlayacaq olan yeni etno-butikini ziyarət edərək "ABAD" məhsulları ilə yaxından tanış oldular.Şərq bazarı 1982-ci ildən paytaxtın simvollarından biri sayılaraq, ölkənin tarixi abidələri siyahısına daxil edilib. Kompleksin təşkili qapalı şərq bazarlarının ənənəvi prinsiplərinə, daxili həyət ideyasına, səciyyəvi şərq günbəzlərinə və ornamentlərinə əsaslanırdı. 2008-ci ildən isə kompleks fəaliyyət üçün yararsız hala gəldi. Lakin, 2018-ci ildə “PMD Projects” qrupu binanın yenidən qurulması işlərinə start verildi. Beləliklə, "Şərq Bazarı" yenidən öz qapılarını memarlığı, ənənəvi dekorativ-tətbiqi sənəti, bədii sənətkarlığı və şərq mətbəxini sevənlərin üzünə açdı. Bu səbəbdən dekorativ-tətbiqi xalq sənətkarlığının təbliğ və inkişafına töhfə verən qurum kimi “ABAD”ın etno-butikinin burada fəaliyyət göstərməsi məqsədəmüvafiq hesab edilib. Bununla da, mövcud və gələcəkdə layihəyə daxil olacaq yüzlərlə sənətkar-“ABAD”çının burada, turizm baxımından cəlbedici olan bazarda, məhsulları satışa çıxarılacaq.

06.06.2022

Nardaran “ABAD” Keramika və Tətbiqi Sənət mərkəzində Uşaqların Beynəlxalq Müdafiəsi Günü keçirildi

1 İyun – Uşaqların Beynəlxalq Müdafiəsi Günü münasibətilə, Sabunçu Rayon İcra Hakimiyyəti, Bakı şəhər Gənclər və İdman Baş İdarəsinin birgə təşkilatçılığı “Uşaqlar Gülsün Deyə” adlı uşaq festivalı keçirildi. Festival Sabunçu rayonu, Nardaran qəsəbəsi, Nardaran Mədəniyyət Mərkəzi və "ABAD" Keramika və Tətbiqi Sənət mərkəzlərinin qarşısında keçirilb. Festival çərçivəsində Nardaran “ABAD” Keramika və Tətbiqi Sənət mərkəzinin sənətkarları uşaqlar üçün dulusçuluq, keramika və rəngkarlıq üzrə master klasslar keçirib. Bundan başqa mərkəzdə “Açıq gün” keçirildi, burada hazırlanan əl işlərinin səyyar satışı baş tutdu. Qeyd edək ki, Nardaran “ABAD” Keramika və Tətbiqi Sənət Mərkəzi "TİKA" və "PAŞA Holding"in dəstəyi ilə 2018-2019-cu illərdə inşa edilərək istifadəyə verilib. Mərkəzin məqsədi ölkəmizin tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasıdır.

01.06.2022

“ABAD”ın yeni etno-butiki açıldı

28 may 2022-ci il tarixində 7 saylı Bakı “ASAN xidmət” mərkəzinin açılışı çərçivəsində mərkəzin 1-ci mərtəbəsində “ABAD” publik hüquqi şəxsin növbəti, sayca 11-ci etno-butikinin açılışı baş tutdu.Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan açılışda iştirak ediblər.Bildirildi ki, digər etno-butiklərdə olduğu kimi, burada da sənətkar “ABAD”çıların əl əməyinin nəticəsi olan dekorativ-tətbiqi xalq sənətkarlığı nümunələrinin daimi sərgi-satışı, həmçinin “ABAD”ın dəstək göstərdiyi ailə təsərrüfatlarının qida brendlərinin satışı həyata keçiriləcəkdir.Daha sonra Azərbaycan və Türkiyə prezidentlərinə “ABAD”çıların əl işi olan xatirə hədiyyələri təqdim olundu.Qeyd edək ki, bu mərkəzlə birgə paytaxtda 7, regionlarda isə 6 etno-butik fəaliyyət göstərir:- “ABAD” etno-butiki İçərişəhər filialı;- “ABAD” etno-butiki “Fairmont” filialı;- “ABAD” etno-butiki “Duty Free” filialı;- “ABAD” etno-butiki 3 saylı Bakı “ASAN xidmət” mərkəzi filialı;- “ABAD” etno-butiki 7 saylı Bakı “ASAN xidmət” mərkəzi filialı;- “ABAD” etno-butiki Bakı Dəmiryolu Vağzalı filialı; - “ABAD” etno-butiki Milli Gimnastika Arenası filialı (yalnız beynəlxalq yarışlar zamanı);- “ABAD” etno-butiki Dəmirçi kəndi filialı;- “ABAD” etno-butiki “Tufandağ” Qış-Yay Turizm İstirahət Kompleksi filialı;- “ABAD” etno-butiki Şəki Keramika və Tətbiqi Sənət mərkəzi filialı ;- “ABAD” etno-butiki Masallı “ASAN Həyat” kompleksi filialı.Bundan başqa, yeni fəaliyyətə başlayacaq mərkəzin həyətində "Good Food by ABAD" təkərli qoşquda (food truck) müxtəlif təamlar təqdim olunacaq.