Xəbərlər

“ABAD” Şəki Keramika və Tətbiqi Sənət Mərkəzinə press-tur təşkil edib

Noyabrın 22-i “ABAD” publik hüquqi şəxs tərəfindən Şəki Keramika və Tətbiqi Sənət Mərkəzinə media nümayəndələri üçün press-tur təşkil olunub. “ABAD”ın direktoru Rüfət Elçiyev və Şəki Keramika və Tətbiqi Sənət Mərkəzinin koordinatoru Mir Teymur Məmmədov Mərkəzin məqsədi və fəaliyyəti barədə ətraflı məlumat verib. Qeyd olunub ki, keramika dünyada xalqların oturaq həyata keçməsinin təcəssümüdür. Bütün sivilizasiyaların qədimliyi keramika ilə ölçülür. Keramika ilk qədim dövrlərdə insanların məskunlaşdığı, yurd saldığı məkanlarda qida ehtiyyatlarının, toxumların və digər əşyaların saxlanması üçün istifadə olunurdu. Mir Teymur Məmmədovun dediyinə görə, Azərbaycanın bütün ərazisi boyu, xüsusilə də Şəki rayonunda aparılan arxeoloji qazıntılar zamanı bir çox keramika nümunələri və qədim odun sobaları üzə çıxarılıb: “IX əsrdə isə Şəki artıq yalnız öz xalça və şirniyyatı ilə deyil, keramikası ilə də dillər əzbəri idi. Sənətin inkişafına yerli yağlı gil yataqlarının mövcüdluğu da böyük təkan verdi”. Rüfət Elçiyev qeyd etdi ki, məhz bu səbəbdən Cənubi Qafqazın ilk Keramika Mərkəzinin burada yaradılması heç də təsadüfi bir hal deyil: “ABAD” Şəki Keramika və Tətbiqi Sənət Mərkəzi “Yuxarı Baş” Dövlət Tarix-Memarlıq qoruğunun ərazisində Qala divarlarının içərisində yerləşən beş kazarma binasından biridir. Bina 1867-ci ildə tikilmiş tarix-memarlıq abidəsidir və 2018-ci ildə “ABAD” və “Paşa Holdinq”in əməkdaşlıq sayəsində bərpa edilmişdir. Mərkəzin məqsədi ölkəmizin, əsasən də Şəki rayonunun tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasıdır”. Daha sonra media nümayəndələri Mərkəzdə keramika sənəti ilə yanaşı xalçaçılıq və digər sənətkarlıq sahələri üzrə təlimlər ilə də tanış oldular. Onlara məlumat verildi ki, burada məqsəd yeni sənətkarların yetişdirilməsidir. “ABAD”ın direktoru Mərkəzdə vətəndaşlar üçün keçirilən nəzəri və tətbiqi kurslar, keramika üçün sobalar, avadanlıqlar və digər materiallar barədə media nümayəndələrinə məlumat verdi: “Evlərində belə peşəkar şəraiti yarada bilməyən vətəndaşlar mərkəzin bütün xidmətlərindən istifadə edə bilərlər, eyni zamanda digər bölgələrdən qoşulan şəxslər üçün də mərkəzin nəznindəki “Qonaq zonası”nda kurs zamanı ödənişsiz gecələmək üçün şərait yaradılıb”. Qeyd edək ki, növbəti il analoji keramika mərkəzinin Bakının Nardaran qəsəbəsində açılışı nəzərdə tutulub.

22.11.2018

“ABAD” ideya müsabiqəsinə start verir!

İdeya müsabiqəsinin əsas məqsədi Azərbaycanda yeni bir istehsal sahəsinin yaradılmasında təklifləri dəyərləndirməkdir. İdeyalarınızın biznes planını tərtib edərək abadideya@gmail.com e-mail ünvanına 1 dekabr 2018-ci il tarixinədək göndərə bilərsiniz. Biznes planınız aşağıdakı şərtlərə cavab verməlidir: • İstehsal istiqaməti qida və ya qeyri-qida üzrə ola bilər• İstehsal müəssisəsi Abşeron iqtisadi-coğrafi bölgəsində yerləşməlidir• İstehsal üçün tələb olunan xammal Azərbaycanın daxili imkanları hesabına qarşılanmalıdır• Məhsul daxili tələbata uyğun olmalıdır• Gələcəkdə ixrac yönümlü məhsul olmalıdır• İnnovativ metodlara əsaslanmalıdır Göndərilən ən yaxşı üç ideya mükafatlandırılacaq. I yer: 500 AZNII yer: 300 AZNIII yer: 100 AZN

12.11.2018

"ABAD" Yaponiyada təqdim olunub

"ABAD" publik hüquqi şəxsinin Sənəd dövriyyəsi, hüquq və kadrlar departamentinin müdiri Vüsal Arzumanlı Yaponiya Beynəlxalq Əməkdaşlıq Agentliyinin (JICA) "Gənc liderlər üçün kiçik va orta biznesin (sahibkarlığın) inkişafı və təşviqi" kursunda iştirak edib. Kurs zamanı "ABAD" modeli təlim iştirakçılarına təqdim edilib.Qeyd edək ki, təlimlər 24 oktyabr - 10 noyabr tarixlərində Yaponiyanin ən böyük prefekturalarından sayılan Hokkaydo prefekturasının mərkəzi olan Sapporo şəhərində keçirilib.

10.11.2018

“ABAD” publik hüquqi şəxs jurnalistlər üçün press-tur təşkil edib

Noyabrın 8-i “ABAD” publik hüquqi şəxs tərəfindən Quba “ABAD Factory” İstehsalat Kompleksinə media nümayəndələri üçün press-tur təşkil olunub. “ABAD”ın direktoru Rüfət Elçiyev Kompleksin məqsədi və fəaliyyəti barədə ətraflı məlumat verib. Qeyd olunub ki, “loft” stilində "Paşa Holdinq"in dəstəyi ilə restavrasiya edilən Kompleksdə 5 istehsalat sahəsi üzrə məhsullar hazırlanır. Qonaqlara quru meyvə, qənnadı, kompot, süd və ət məhsullarının istehsalat prosesi haqqında geniş məlumat verilib. Daha sonra media nüməyəndələri həmçinin "Paşa Holdinq"in dəstəyi ərsəyə gələn “Gastro Village” layihəsinin “food truck”-ları və Quba rayonunda yerləşən “ABAD” Məktəbinin fəaliyyəti ilə yaxından tanış olublar. Sonda media nümayəndələrinə “ABAD”ın təşəbbüsü ilə başlayan 9 noyabr Azərbaycan Respublikası Bayraq Gününə həsr olunmuş “Yeni bir ənənə - bayraqlar hədiyyə” adlı aksiya haqqında məlumat verilib.

08.11.2018

“ABAD”ın satış guşəsi Azərbaycanın ən böyük hipermarketində

Bu gün noyabrın 7-si Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Leyla Əliyeva metronun “Koroğlu” stansiyasının yaxınlığında yerləşən “Bravo” marketlər şəbəkəsinin yeni hipermarketinin açılışında iştirak edərək burada fəaliyyət göstərəcək “ABAD” Bakaleyası ilə də tanış olublar. Qeyd edilib ki, burada müştərilər ABADçıların istehsal etdikləri qida və dekorativ-tətbiqi xalq sənətkarlığı məhsullarını da əldə edə bilərlər. Həmçinin ölkə başçısının diqqətinə çatdırılıb ki, "ABAD" Bakaleyası "Paşa Holdinq"in dəstəyi ilə ərsəyə gəlib. “ASAN xidmət”in tabeliyində olan “ABAD” - Ailə Biznesinə Asan Dəstək publik hüquqi şəxs Prezident İlham Əliyevin 2016-cı ildə imzaladığı Fərmana əsasən yaradılıb. Əsas məqsədi ölkənin sosial-iqtisadi inkişafında vətəndaşların fəal iştirakını, kiçik və orta sahibkarlığın inkişafını, əhalinin məşğulluq səviyyəsinin artırılmasını təmin etmək olan “ABAD” rəqabətqabiliyyətli ailə təsərrüfatlarının formalaşdırılmasına dəstək verir, sosialyönümlü layihələrin həyata keçirilməsində birbaşa iştirak edir. Mənbə: https://president.az/articles/30608

07.11.2018

Şəkidə “ABAD” Keramika və Tətbiqi Sənət Mərkəzinin açılışı baş tutdu

Oktyabrın 29-da Azərbaycan Respublikasının Prezidenti İlham Əliyev və birinci xanım Mehriban Əliyeva Şəkiyə səfərləri çərçivəsində “ABAD” Keramika və Tətbiqi Sənət Mərkəzinin açılışında iştirak ediblər. Dövlətimizin başçısı Mərkəzin rəmzi açılışını bildirən lenti kəsdi. “ASAN xidmət”in tabeliyində olan “ABAD” - Ailə Biznesinə Asan Dəstək publik hüquqi şəxs Prezident İlham Əliyevin 2016-cı ildə imzaladığı Fərmana əsasən yaradılıb. Əsas məqsədi ölkənin sosial-iqtisadi inkişafında vətəndaşların fəal iştirakını, kiçik və orta sahibkarlığın inkişafını, əhalinin məşğulluq səviyyəsinin artırılmasını təmin etmək olan “ABAD” rəqabətqabiliyyətli ailə təsərrüfatlarının formalaşdırılmasına dəstək verir, sosialyönümlü layihələrin həyata keçirilməsində birbaşa iştirak edir. “ABAD” öz fəaliyyətini regional mərkəzlər vasitəsilə qurur. Masallı, Balakən, Quba rayonlarında artıq belə mərkəzlər fəaliyyətə başlayıb. Dekorativ-tətbiqi xalq sənətkarlığı və kənd təsərrüfatı sahəsində fəaliyyət göstərən ailə bizneslərinə dəstək verən layihə çərçivəsində “ABAD”çı ailələrinə mürəbbə, cem, ət və süd məhsullarının istehsalı üçün xüsusi konteynerlər verilib. İndiyə qədər dekorativ-tətbiqi sənətlə məşğul olan 100-dən çox və kənd təsərrüfatında çalışan onlarla ailəyə dəstək verilib. Satışları təşkil etmək məqsədilə “ABAD” müxtəlif yerlərindəb mərkəzlər açıb. Azərbaycan Respublikası Prezidentinin hüquq-mühafizə orqanları ilə iş və hərbi məsələlər üzrə köməkçisi-şöbə müdiri Fuad Ələsgərov və Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev məlumat verdilər ki, “ABAD” publik hüquqi şəxsin Şəki Keramika və Tətbiqi Sənət Mərkəzinin binası XIX əsrin axırlarında tikilib və kazarma kimi istifadə olunub. Baxımsız və qəzalı şəraitdə olan həmin bina “Paşa Holdinq”in dəstəyi ilə yenidən qurulub. Mərkəz müasir avadanlıqla təchiz edilib. Qədim köklərə malik xalqların böyük tarixinin sübutu onun keramikası ilə də müəyyən edilir. Azərbaycanın bütün ərazisi boyu, xüsusilə də Şəki rayonunda aparılan arxeoloji qazıntılar zamanı bir çox keramika nümunələri və qədim odun sobaları üzə çıxarılıb. Mərkəzlə tanışlıq zamanı bildirildi ki, “Yuxarı Baş” Dövlət Tarix-Memarlıq qoruğu Şəki şəhərinin qədim tarixi hissəsində yerləşir. Qoruğun UNESCO-nun mədəni irs siyahısına salınması yönündə dövlət tərəfindən müvafiq işlər həyata keçirilir. “Xan sarayı” I, IV, V meyarlarla irs siyahısına salınıb. Şəki Keramika və Tətbiqi Sənət Mərkəzinin binası da qoruğun UNESCO-nun müvafiq siyahısına salınacaq ərazisində, Qala divarlarının içərisində yerləşən beş kazarma binasından biridir. Bina 1867-ci ildə tikilmiş tarix-memarlıq abidəsidir. İkimərtəbəli binada işçilər və təlimlərə qoşulacaq şəxslər üçün istirahət otaqları da var. Burada, həmçinin termik soba və təlim otaqları, xammal və hazır məhsul anbarları, etno-butik, ofis və xalçaçılıq otağı yerləşir. Bir sözlə, mərkəzdə keramika və tətbiqi sənətlə məşğul olanlar üçün hər cür şərait yaradılıb. Mərkəzin məqsədi ölkəmizin, əsasən də Şəki rayonunun tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasıdır. Bura həm də Qafqazda ilk Keramika Mərkəzi kimi tarixə düşəcək. Gələcəkdə Mərkəzdə tanınmış əcnəbi sənətkarların iştirakı ilə beynəlxalq tədbirlər, həmçinin müasir avadanlıqlardan istifadə etməklə təlimlər təşkil olunacaq. Mərkəzdə keramika sənətindən əlavə, xalçaçılıq və digər sənətkarlıq sahələri üzrə təlimlərin keçirilməsi də nəzərdə tutulur. Bütün bunlardan məqsəd yeni sənətkarların yetişdirilməsidir. Bildirildi ki, Şəki Keramika və Tətbiqi Sənət Mərkəzində sənətkarların istehsal etdikləri məhsulların satışı da təşkil olunacaq. Ümumilikdə burada 40-dək vətəndaş daimi işlə təmin ediləcək.