Xəbərlər

“ABAD” I Üzüm və Şərab Festivalında iştirak edib

Şamaxı rayonunun Meysəri kəndində Azərbaycanda ilk dəfə Üzüm və Şərab Festivalı keçirilib. Tədbir “Şirvan şərabları” MMC-nin üzümçülük və şərabçılıq kompleksi ərazisində təşkil olunub.Festival Heydər Əliyev Fondunun dəstəyi, Kənd Təsərrüfatı Nazirliyi, Şamaxı Rayon İcra Hakimiyyəti, “Regional İnkişaf” İctimai Birliyi, Dövlət Turizm Agentliyi və Azərbaycan Milli Xalça Muzeyinin birgə təşkilatçılığı ilə keçirilir. Layihənin məqsədi yerli üzüm və şərab istehsalının təşviqi, şərab məhsullarının ixrac potensialının artırılması, Azərbaycanda şərab istehsalı tarixinin geniş ictimaiyyətə çatdırılmasıdır.“ABAD” publik hüquqi şəxs festivalda ABADçıların istehsalı olan “AVEY” və digər şərabları ilə, həmçinin müxtəlif çeşiddə olan pendirləri ilə təmsil olunub.Bundan başqa, festival günlərində üzüm istehsalı və şərabçılıq, ölkənin turizm potensialı ilə bağlı müxtəlif maarifləndirici və əyləncəli tədbirlərlə yadda qalıb.

31.08.2019

“ABAD” kənd təsərrüfatı sahəsində Çin təcrübəsini öyrənir

"ABAD" PHŞ-in keyfiyyətə nəzarət mütəxəsisi Cahangir Əliyev 23 iyul-12 avqust 2019-cu il tarixlərində Çin Xalq Respublikasında keçirilən “İnkişafda olan ölkələr üçün kənd təsərrüfatı sahəsində Çin təcrübəsi” adlı seminarda iştirak edib.Seminarın keçirlməsində məqsəd qarşılıqlı münasibətləri inkişaf etdirmək, ölkələrarası dostluğu dərinləşdirmək və inkişaf etməkdə olan ölkələr arasında kənd təsərrüfatı sahəsində mübadilə və əməkdaşlığı təşviq etmək üçün platformalar yaratmaqdır.Sessiyada təqdimatlar və sahə gəzintisi yer alıb. Hökümət nümayəndələri və ekspertlər tərəfindən “Çinin ümumi icmalı”, “Çinin tərəqqisi və iqtisadi inkişafı”, “Çinin kənd təsərrüfatının inkişafında təcrübəsi”, “Kənd infrastrukturunun inkişafı”, “Çinin yaşıl kənd təsərrüfatının inkişafı strategiyası və beynəlxalq əməkdaşlıq” kimi mövzuları əhatə edən təqdimatlar edilib. Bundan əlavə, iştirakçılar ətraf ərazilərə baş çəkib, yerli hökumət nümayəndələri ilə kənd yerlərinin inkişafı ilə bağlı müzakirələr aparıblar və eyni zamanda gələcək əməkdaşlıq üçün imkanları dəyərləndiriblər.Cahangir Əliyev, həmçinin "ABAD" və onun fəaliyyəti haqqında çıxışlar edib, Azərbaycanın kənd təsərrüfatı sahəsində təcrübəsi barədə məlumat verib.

19.08.2019

ABADçı məhsulları “Networking Cocktail”-də təqdim olunub

27 iyul 2019-cu il tarixdə Bakının tarixi guşəsi olan İçəri Şəhər ərazisində yerləşən Sənət Qalası Qalereyasında (Art Tower Gallery) Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” - Ailə Biznesinə Asan Dəstək publik hüquqi şəxsin, “Naiqin-K Tovuz Baltiya” şirkətinin və “Art Council”ın birgə təşkilatçılığı ilə “Şəbəkələşmə kokteyli” (Networking cocktail) keçirilib.Korporativ sosial sahibkarlığın inkişafına dəstəyin göstərilməsi məqsədilə təşkil olunan bu tədbirdə ölkə ərazisində fəaliyyət göstərən diplomatik korpusların, özəl və dövlət sektorunun nümayəndələri, vətəndaş cəmiyyəti institutlarının təmsilçiləri iştirak ediblər.Tədbirin keçirilməsində məqsəd ABADçıların istehsal etdikləri süd məmulatları və “Naiqin-K Tovuz Baltiya”nın məhsullarını qonaqlara dequstasiya üçün təqdim etmək, “Made in Azerbaijan” brendi altında istehsal olunan yerli istehsalata dəstək olmaq və fəaliyyət çərçivəsində əməkdaşlıq edilən əsas partnyorların iştirakı ilə əməkdaşlıq imkanlarının genişləndirilməsi üçün yeni platformalar qurmaqdır.

27.07.2019

"ABAD"ın fəaliyyəti Malaziyada təqdim olunub

14-25 iyul 2019-cu il tarixində Malayziya Texniki Əməkdaşlıq Proqramı (MTCP) və Malaziyanın Xarici İşlər Nazirliyinin təşəbbüsü, Kənd İnkişafı İnstitutunun (INFRA) təşkilatçılığı ilə "İnkişaf etməkdə olan kiçik ada ölkələri və Asiya üçün davamlı kənd təsərrüfatının inkişafı" kursu keçirilib. Məqsəd Asiya və inkişaf etməkdə olan kiçik ada ölkələrinin dövlət nümayəndələrini Malayziyanın kənd təsərrüfatının inkişafı istiqamətində görülən işlər, nailiyyətlər, tətbiq olunan metodik proqramlar, innovasiyalarla tanış etmək və təcrübə mübadiləsi aparmaqdır. Kursda Banqladeş, Samoa, Şri-Lanka, Vyetnam, Konqo, Filippin, Qırğızıstan, Kamboca ilə yanaşı Azərbaycan da təmsil olunub. İnformativ və praktiki sessiyalarla yanaşı iştirakçılar Malayziyanın Kənd Təsərrüfatının İnkişafı və Xarici işlər nazirlikləri, Putra Malayziya Universiteti və digər yerli qurumlarla tanış olublar, yerli kiçik sahibkarlarla fikir mübadiləsi aparılıb. Kurs çərçivəsində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ASAN xidmət” mərkəzləri və “ABAD” publik hüquqi şəxsin fəaliyyəti və mexanizmi ilə bağlı geniş məlumat verilib, “ABAD” haqqında xüsusi təqdimat gerçəkləşib və iştirakçıların sualları cavablandırılıb.

26.07.2019

“ABAD” və Qazaxıstan Respublikasının Türkistan vilayəti əməkdaşlıq edəcək

5 iyul tarixində Bakı şəhərində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində fəaliyyət göstərən “ABAD” publik hüquqi şəxs və Qazaxıstan Respublikasının Türkistan vilayətinin icra hakimiyyəti arasında Niyyət protokolu imzalanıb.Protokol “ABAD” publik hüquqi şəxsin direktoru Rüfət Elçiyev və Türkistan vilayətinin icra hakiminin müavini Meirjan Mirzaliyev arasında imzalanıb.Sənəd Azərbaycanın “ABAD” modeli əsasında Qazaxıstan Respublikasının Türkistan vilayətində sənətkarlıq sahəsi üzrə mikro və kiçik sahibkarlığın daha da inkişaf etdirilməsi məqsədini nəzərdə tutur.Xatırladaq ki, “ABAD” – Ailə Biznesinə ASAN Dəstək – 2016-cı ildən həmçinin dekorativ-tətbiqi xalq sənətkarlığı ilə məşqul olan mikro kiçik və orta sahibkarlara dəstək göstərir. Bugünədək ABADçı-sənətkarların sayı artıq 300-ü ötüb. Sənətkarların əl işlərinin satışı üçün ölkənin fərqli coğrafi ərazilərində 9 etno-butik fəaliyyət göstərir. Burada Azərbaycanın milli ruhunu özündə daşıyan müxtəlif məmulatlar əldə etmək mümkündür. Dekorativ-tətbiqi xalq sənətkarlığı istiqamətində özünü təkmilləşdirmək istəyən şəxslər üçün isə Respublika üzrə “ABAD” Məktəbləri fəaliyyət göstərir.Qeyd edək ki, Turkistan – Böyük İpək Yolu boyunca yerləşən tarixi ərazi olmaqla yanaşı, həmçinin türk dünyasının mənəvi paytaxtı hesab olunur. 2019-cu ilin sonunadək Türkistan vilayətində Böyük İpək Yolunun Ənənəvi Sənətkarlıq Mərkəzinin açılması nəzərdə tutulur. Layihəyə əsasən, mərkəzdə Türk dünyasını təmsil edən sənətkarlar orada yaşayaraq öz peşələri üzrə fəaliyyətlərini davam etdirəcəklər. Niyyət protokolu bu və digər layihələrdə “ABAD” və Türkistanın Böyük İpək Yolu Ənənəvi Sənətkarlıq Mərkəzi arasında təcrübə mübadiləsini nəzərdə tutur.

05.07.2019

Beynəlxalq Keramika Simpoziumu başa çatıb

Şəki “ABAD” Keramika və Tətbiqi Sənət Mərkəzində təşkil olunan “Təbiətdən tarixə” adlı Keramika üzrə Beynəlxalq Simpoziumun bağlanış mərasimi baş tutub.Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Şəki Şəhər İcra Hakimiyyətinin başçısı Elxan Usubov, Dövlət Turizm Agentliyinin sədri Fuad Nağıyev, “ABAD” publik hüquqi şəxsin direktoru Rüfət Elçiyev, Şəki “ABAD” Keramika və Tətbiqi Sənət Mərkəzinin kuratoru Mir Teymur Məmmədov və Simpoziumun türkiyəli iştirakçısı Serap Ünel çıxış ediblər. Rəsmi hissədən sonra 15 ölkədən 25 iştirakçı sertifikatlarla təltif olunub. Sonda “Yanar heykəl” keramika şousu təqdim olunub. “ABAD” publik hüquqi şəxsin təşəbbüsü və "Paşa Holdinq"in dəstəyi ilə 20 may - 2 iyun tarixində təşkil olunan beynəlxalq Simpoziumun məqsədi müxtəlif ölkələrdən olan sənətkar-keramistlər ilə təcrübə mübadiləsi aparmaq, iştirakçıları və ziyarətçiləri keramika sənətinin müasir meylləri və milli mədəniyyətimiz ilə tanış etmək olub.