Xəbərlər

Berqama bələdiyyəsinin sədri Şəki "ABAD" Keramika və Tətbiqi sənət mərkəzini ziyarət edib

2022-ci il 23 avqust tarixində Şəki ilə qardaşlaşmış Türkiyənin İzmir vilayətinin Berqama bələdiyyəsinin sədri Hakan Koştunun başçılıq etdiyi nümayəndə heyəti Azərbaycanın bu qədim diyarına səfər edib. Səfər çərçivəsində qonaqlar “Yuxarı Baş” Milli Tarix-Memarlıq Qoruğunun ərazisini gəzib, buradakı tarixi abidələrə baş çəkib. Rəsmi heyət həmçinin qoruğda yerləşən “ABAD” Keramika və Tətbiqi sənət mərkəzini də ziyarət ediblər. Görüşdə Şəki Şəhər İcra hakimiyyətinin nümayəndələri və deputat Vüqar İsgəndərov iştirak ediblər. Qonaqlara mərkəz haqqında ətraflı məlumat verilib.Diqqətə çatdırılıb ki, “ABAD” Keramika və Tətbiqi Sənət Mərkəzinin açılışı 29 oktyabr 2018-ci il tarixində baş tutub. Mərkəzin binası XIX əsrin axırlarında tikilib və kazarma kimi istifadə olunub. Müasir avadanlıqla təchiz edilmiş mərkəz ölkənin, əsasən də Şəki rayonunun tarixi keramika ənənələrinin qorunub saxlanılması və gələcək nəsillərə ötürülməsi, həmçinin müxtəlif çeşidli Azərbaycan gilinin dünyada tanıdılmasında töhfə verir. Cənubi Qafqazda ilk Keramika Mərkəzi olan “ABAD” Keramika və Tətbiqi Sənət Mərkəzinin məhz Şəkidə yaradılması və Beynəlxalq Keramika Simpoziumunun da bu mərkəz vasitəsi ilə keçirilməsi sayəsində Şəki şəhəri Avropa Keramika Marşrutuna (European Route of Ceramics) üzv seçilib.

23.08.2022

“ABAD” Azərbaycanda ilk dəfə keçirilən “CultRural” festivalında iştirak edib

6 avqust tarixində Passage 1901 sərgi salonunda keçirilən festivalda “ABAD” publik hüquqi şəxs öz sərgi-satış stendi ilə iştirak edib və “ABAD”çılar tərəfindən dulusçuluq, vitraj, təkəlduz istiqamətlərində master klasslar keçirilib. Festival müddətində “ABAD”çı məhsulları sərginin yerli və xarici ziyarətçiləri tərəfindən böyük maraqla qarşılanıb.Qeyd edək ki, ailə bizneslərinə və sənətkarlara öz məhsullarını nümayiş etdirməklə daha geniş platformalara çıxış imkanı qazandırmaq məqsədi daşıyan festival Alman-Azərbaycan Xarici Ticarət Palatası və Plovdiv Ticarət və Sənaye Palatasının birgə tərəfdaşlığı çərçivəsində “EU4Business: Connecting Companies” təşəbbüsünün bir hissəsi olaraq həyata keçirilib və festivalın ilk mərhələsi 20-24 iyul tarixlərində Bolqarıstanın Plovdiv şəhərində baş tutub.

08.08.2022

Meksikanın Səfiri Quba “ABAD Factory”nin qonağı oldu

İyulun 29-da Birləşmiş Meksika Ştatlarının Azərbaycan Respublikasındakı fövqəladə və səlahiyyətli səfiri cənab Xuan Rodrigo Labardini Floresin Quba rayonuna səfəri baş tutdu. Səfər çərçivəsində səfir və onun nümayəndə heyəti həmçinin Quba “ABAD Factory”nin fəaliyyəti ilə yaxından tanış olublar. Səfirin diqqətinə çatdırılıb ki, “Quba ABAD Factory” İstehsalat Kompleksinin yerləşdiyi bina 1956-cı ildə “Mədəniyyət evi” qismində istifadəyə verilib. Ancaq uzun illər istismar olunması nəticəsində yararsız vəziyyətə düşüb. Daha sonra isə ikimərtəbəli binada “ABAD” publik hüquqi şəxs tərəfindən “Paşa Holding”in dəstəyi ilə əsaslı şəkildə təmir-bərpa işləri aparılıb və müasir avadanlıq quraşdırılıb. Nəticədə ən müasir formada təmirli bina yaradılıb, eyni zamanda ən müasir avadanlıqlar yerləşdirilib. İkimərtəbəli, ümumi sahəsi 1500 kvadratmetrə yaxın olan müasir istehsalat kompleksində “ABAD”çılar 5 istehsal sahəsi üzrə fəaliyyət göstərir. Bura quru meyvələr, kompot, qənnadı, süd və ət məhsulları daxildir. İstehsal kompleksində yaradılmış şərait və iş prinsipi ilə tanış olan səfir mərkəzə gələcək fəaliyyətində uğurlar arzulayıb.

01.08.2022

“ABAD” Bolqarıstanda festivalda təmsil olunub

“ABAD” publik hüquqi şəxs 20-24 iyul tarixlərində Bolqarıstanın Plovdiv şəhərində "Əl işləri və müasir incəsənət” adlı festival həftəsində iştirak edib. Festival Alman-Azərbaycan Xarici Ticarət Palatası və Plovdiv Ticarət və Sənaye Palatasının birgə tərəfdaşlığı çərçivəsində “EU4Business: Connecting Companies” təşəbbüsünün bir hissəsi olaraq keçirilib.Ailə bizneslərinə və sənətkarlara öz məhsullarını nümayiş etdirməklə daha geniş platformalara çıxış imkanı qazandırmaq məqsədi daşıyan festivalda qurumu Dekorativ-tətbiqi xalq sənətkarlığı departamentinin müdiri Ləman Əhmədova təmsil edib. “ABAD”çı məhsulları xüsusi ayrılmış stenddə yerli əhaliyə və qonaqlara təqdim olunub, həmçinin “ABAD” və onun fəaliyyət istiqamətləri sərgidə iştirak edən xarici qurumların nümayəndələrinə tanıdılaraq mümkün əməkdaşlıq perspektivləri müzakirə olunub.Festival müddətində “ABAD”çı məhsulları yerli əhali və sərgidə iştirak edən şirkət nümayəndələri tərəfindən maraqla qarşılanıb.Sərginin davamı olaraq 6 avqust 2022-ci il tarixində 1-ci Azərbaycan "CultRural" festivalının keçirilməsi və sərgi heyətinin ölkəmizə səfəri gözlənilir.

24.07.2022

"ABAD Food Hall" №6 istifadəyə verildi

İyulun 20-də 2 saylı Sumqayıt regional “ASAN xidmət” Mərkəzi istifadəyə verilib. Azərbaycan Respublikasının Prezidenti İlham Əliyev Mərkəzin açılışında iştirak edib. Mərkəzdə ənənəvi olaraq “ABAD Food Hall” təşkil edilib.Sumqayıt “ABAD Food Hall” sayca 6-ci sərgi-satış salonudur. Burada "ABAD"çılar tərəfindən qeyri-sənaye üsulu ilə hazırlanmış qida məhsulları təqdim olunacaq.Xatırladaq ki:- İmişli “ABAD Food Hall” 2018-ci il 22 oktyabr;- Şəki “ABAD Food Hall” 2018-ci il 29 oktyabr;- Şamaxı “ABAD Food Hall” 2019-cu il 5 dekabr;- Kürdəmir “ABAD Food Hall” 2020-ci 12 fevral;- Ağcabədi “ABAD Food Hall” isə 2020-ci il 3 iyun tarixində fəaliyyətə başlayıb.

21.07.2022

“ABAD”çılara dəstək mexanizmi genişləndirilir

“ABAD” publik hüquqi şəxs, İqtisadiyyat Nazirliyi yanında Sahibkarlığın İnkişafı Fondu (SİF) və “Yelo Bank” ASC ailə təsərrüfatlarının yaradılması və genişləndirilməsinə dəstək göstərilməsi, “ABAD”çıların investisiya layihələrinin dövlətin güzəştli kreditləri hesabına maliyyələşdirilməsi məqsədilə birgə əməkdaşlığa start verdilər. “ABAD” publik hüquqi şəxs mikro, kiçik və orta sahibkarlığın inkişafı, əhalinin məşğulluq səviyyəsinin artırılması və rəqabətqabiliyyətli ailə təsərrüfatlarının formalaşdırılmasına dəstək verməklə, sosialyönümlü layihələr həyata keçirir. “ABAD” mərkəzləri vasitəsilə ailə təsərrüfatlarının formalaşdırılması və inkişaf etdirilməsi məqsədilə “ABAD”çılara (“ABAD”-ın müşayiəti ilə yaradılan və ya “ABAD”a qoşulmaqla öz bizneslərini inkişaf etdirmək istəyən sahibkarlıq subyektləri) biznes-planlaşdırma, konsaltinq, marketinq, brendinq, dizayn, mühasibatlıq, hüquqi yardım, logistika işinin və satışların təşkili kimi dəstək xidmətləri göstərilir. SİF tərəfindən müvəkkil kredit təşkilatları vasitəsi ilə “ABAD”çılara güzəştli kreditlərin verilməsi də “ABAD”ın növbəti dəstək mexanizmidir.Belə ki, 2022-ci ilin iyun-iyul ayları ərzində “ABAD”çılara məxsus üç investisiya layihəsinin maliyyələşdirilməsi məqsədilə SİF “ABAD”çılara 110 min manat güzəştli kredit vəsaiti ayırıb. “Yelo Bank” ASC həmin kreditlərin sahibkarlara verilməsində müvəkkil kredit təşkilatı qismində çıxış edib. Maliyyələşdirilmiş layihələr bağçılıq, arıçılıq və heyvandarlığın inkişafına xidmət edir. Birgə əməkdaşlıq “ABAD”çıların maliyyə resurslarına çıxışının asanlaşdırılmasına, ailə təsərrüfatlarının rəqabət qabiliyyətinin, həmçinin, əhalinin məşğulluq səviyyəsinin artırılmasına, xüsusilə də ölkədə mikro, kiçik və orta sahibkarlığın inkişafına töhfə verəcəkdir.