Xəbərlər

Ağdamda müasir tələblərə cavab verən heyvan kəsimi məntəqəsinin inşasına start verilib

Aprelin 17-də "ABAD" PHŞ və AQTA-nın birgə layihəsi olan Ağdam rayonunun Quzanlı qəsəbəsində müasir tələblərə cavab verən heyvan kəsimi məntəqəsinin inşasına başlanılıb. Yeni qurulacaq heyvan kəsimi məntəqəsi işğaldan azad olunmuş ərazilərdə əhalinin əsas məşğuliyyətlərindən biri olan heyvandarlığın, həmçinin heyvan kəsimi fəaliyyətinin müasir tələblərə uyğunlaşdırılması, istehlakçıların sağlam ət və ət məhsulları ilə təmin olunması, həmin ərazilərdə fəaliyyət göstərən sahibkarlar üçün əlverişli biznes mühitinin formalaşdırılmasına xidmət göstərəcək. İnşasına başlanan yeni heyvan kəsimi məntəqəsi zoonoz xəstəliklərin nəzarətdə saxlanılması, heyvandan insana keçən xəstəliklərin qarşısının alınması ilə yanaşı, həmin ərazidə heyvan sağlamlığı və baytarlıq nəzarəti mexanizmlərinin daha səmərəli təşkil olunmasına köməklik göstərəcək. Qeyd edək ki, müasir tələblərə cavab verən heyvan kəsimi məntəqəsinin yaradılması ilə bağlı əvvəlcədən müvafiq qurumlarla birgə təşkilati işlər həyata keçirilmiş, xidmətin daha effektiv təşkili üçün zəruri amillər nəzərə alınıb. Mikro və kiçik sahibkarlıq subyektləri ilə iş təcrübəsini nəzərə alaraq, “ABAD” publik hüquqi şəxsi də müasir heyvan kəsimi məntəqəsinin gələcək fəaliyyətində cəlb olunacaq iştirakçıların seçimini təşkil edəcək, onların potensialını və biznes idarəetmə səriştəliliyini dəyərləndirib, ət kəsimi sahəsi üzrə “ABAD”çılar yetiştirəcək və onlara “ABAD” dəstək proqramına daxil olan xidmətlər göstərəcəkdir. AQTİ laboratoriyalarının da fəaliyyət göstərəcəyi müasir heyvan kəsimi məntəqəsində kəsimə və dövriyyəyə çıxarılacaq ət və ət məhsullarına baytarlıq-sanitariya nəzarəti həyata keçiriləcəkdir. Qeyd edək ki, Ağdamın Quzanlı qəsəbəsində fəaliyyət göstərəcək yeni kəsim məntəqəsi yerli sahibkarlara peşəkar dəstəyin göstərilməsi və müasir tələblərə cavab verən xidmətlərin təşkilində yeni imkanlar yaradacaqdır. Məntəqədə fəaliyyət göstərəcək sahibkarların, eləcə də işə cəlb ediləcək işçi heyətin təlimləri Agentliyin əvvəl icra etdiyi layihələrdən əldə olunan təcrübə əsasında aidiyyəti qurumlarla birgə həyata keçiriləcək.

17.04.2021

Özbəkistan Respublikasının Ədliyyə Nazirliyi yanında Dövlət Xidmətləri Agentliyinin heyəti “ABAD”la tanış oldu

08 aprel 2021-ci il tarixində Özbəkistan Ədliyyə Nazirliyi yanında Dövlət Xidmətləri Agentliyinin direktoru Uluqbek Muxammadiyevin rəhbərlik etdiyi nümayəndə heyəti “ABAD” publik hüquqi şəxsin fəaliyyəti ilə yaxından tanış olub. “ABAD”ın direktoru Rüfət Elçiyev qonaqları qarşılayaraq onlara “ABAD”ın fəaliyyəti, məqsədləri, töhfələri və perspektivləri haqqında geniş məlumat verib.Görüş zamanı nümayəndə heyəti “ABAD”çıların əl işləri və istehsal etdikləri qida məhsulları ilə 3 saylı Bakı “ASAN xidmət” mərkəzində yerləşən “ABAD” etno-butiki vasitəsi ilə tanış olublar.Özbəkistanlı qonaqlar “ABAD”ın ölkədəki kiçik və orta sahibkarlığın inkişafındakı müstəsna əhəmiyyətini vurğulamış və gələcək əməkdaşlıq, təcrübə mübadiləsi istiqamətlərin təşfiqi üzrə işlərin aparılmasına start verib.

12.04.2021

"ABAD" publik hüquqi şəxsin 2020-ci il hesabatı

“ABAD” publik hüquqi şəxs 2020-ci il ərzində də öz fəaliyyətini davam etdirdi. 2020-ci ildə COVİD_19 pandemiyası ilə əlaqəli bizim ölkədə xüsusi karantin rejimi 9 ay davam edib. Mövcud vəziyyətlə bağlı vətəndaşların qəbulu olmadığına baxmayaraq “ABADçı”ların sayı il ərzində 53 ailə artaraq 474-ə çatıb. Cari ildə satış mərkəzlərinin sayında artım olub. Belə ki, "Paşa Holdinq"in dəstəyi ilə 14 yeni “ABAD” stendi “Bravo 28 Mall”, “Bravo Dəniz Mall”, “Bravo Şokolad Tower”, “Grandmart Altes Plaza”, “Grandmart Aff Mall”, “Grandmart AFF Business”, “Grandmart Odlar Yurdu”, “Bolmart Təzə Bazar”, “Bolmart 9 mirkrorayon” və s. açılaraq sayları 19-a çatıb. Regional mərkəzlərin də sayında dəyişiklik olub. “ABAD” Tovuz regional mərkəzinin açılışı ilə ölkədə fəaliyyət göstərən “ABAD” regional mərkəzlərinin sayı 6-ya çatıb. 2020-ci il ərzində daha bir “ABAD Factory” İstehsalat Kompleksinin açılışı baş tutub. Sayca ikinci olan Tovuz “ABAD Factory” İstehsalat Kompleksi Bitkilərin Emalı və Qurudulması üzrə istiqamətlənib. Həmçinin “ABAD” Məktəblərinin də sayı çoxalıb. İkinci "ABAD" Məktəb Tovuz "ASAN Həyat" kompleksi nəzdində açılıb. Çox sevindirici hallardan biri də odur ki, qida məhsullarının istehsalı sahəsində məhsulların çeşidi artıb. 3 növ təbii yağ (fındıq, qoz, küncüt), 7 növ ədviyyat, 5 növ dolma, müxtəlif xəmir polufabrikatları, gavalı qurusu, müxtəlif un və şirniyyatlar: Çak-Çak və Şəki halvası "ABAD" qida assortimentinə daxil edilib. İl ərzində “ABAD” publik hüquqi şəxs Niyyət Protokolu imzalayıb. Niyyət Protokolu “ABAD” publik hüquqi şəxs, Azərbaycan Beynəlxalq Bankı və Aqrar Kredit və İnkişaf Agentliyi (AKİA) arasında Sahibkarlığın inkişafının dəstəklənməsi və bu çərçivədə sahibkarlıq subyektlərinin özinvestisiya layihələrini reallaşdırmaq məqsədi ilə imzalanıb. “ABAD”ın il ərzində qatıldığı maraqlı layihələrdən "Dönər biznesinin sağlamlaşdırılması" və "İşğaldan azad olunmuş ərazilərdə müasir tələblərə uyğun heyvan kəsimi" kimi layihələri qeyd edə bilərik.

01.02.2021

“ABAD” “Kiçik Qrant Layihələri” müsabiqəsinin qalibi seçildi

“ABAD” publik hüquqi şəxsi Yaponiya Beynəlxalq Əməkdaşlıq Agentliyinin (YBƏA) Azərbaycan Məzunları Assosiasiyasının fəaliyyəti çərçivəsində 2020-ci il üçün elan etdiyi “Kiçik Qrant Layihələri” müsabiqəsində mini qranta layiq görüldü. “ABAD” publik hüquqi şəxs müsabiqədə “Quba ABAD Factory” İstehsalat kompleksi üçün tarix kodu çap maşının satınalınması” layihəsi ilə çıxış edərək qalib gələn dörd layihədən biri seçildi.Qrantda qazanılmış BT Mark M-824 markalı printer Quba “ABAD Factory” İstehsalat Kompleksinə göndərilib. Bu cihaz vasitəsi ilə məhsul qablaşdırması zamanı əl əməyini minimuma endirməklə prosess daha səmərəli, məhsulların üzərində istehsal və son istifadə tarixlərinin qeyd olunduğu stikerlər isə daha keyfiyyətli, davamlı və oxunaqlı olmaqla yanaşı, məhsulun bazarda rəqabətqabililiyyətliyinə də öz töhfəsini verəcəkdir.

28.01.2021

“ABAD” “YAŞAT” Fonduna dəstək mexanizmini açıqladı

Sosial-iqtisadi layihə olan “ABAD” publik hüquqi şəxs cəmiyyətə öz töhfələrini verməkdə davam edir. Bu il cərəyan edən COVID-19 pandemiyasından zərər çəkənlərə, Silahlı Qüvvələrə Yardım Fonduna müvafiq yardımlar göstərilib. “ABAD” publik hüquqi şəxs Vətən müharibəsi zamanı şəhid olan əsgər və zabitlərin ailələrinə, qazilərə yardımı isə “YAŞAT” Fondu vasitəsilə həyata keçirəcək.“ABAD” publik hüquqi şəxs də bu dəstəyə qoşularaq 2020-ci il dekabrın 7-dən satışa çıxarılan, şəhidlərin anım simvoluna çevrilmiş, gümüşdən hazırlanan Xarıbülbül yaxalıqlarının satışından əldə edilən vəsaitin bir qismini “YAŞAT” Fonduna köçürülməsi barədə qərar qəbul edib. “YAŞAT” Fondu Azərbaycan Respublikasının Prezidenti İlham Əliyevin 8 dekabr 2020-ci il tarixli Fərmanı əsasında yaradılıb. Fond ölkə ictimaiyyəti tərəfindən Azərbaycan Respublikasının ərazi bütövlüyünün müdafiəsi zamanı yaralananların və şəhid ailələrinin təminatına dəstək məqsədilə yaradılmış bir platformadır.

25.12.2020

"ABAD" işğaldan azad edilən ərazilər üzrə yeni layihələrdə iştirak edir

“ABAD” publik hüquqi şəxs və AQTA işğaldan azad olunmuş ərazilərdə yeni layihəyə start verib.Layihənin həyata keçirilməsində əsas məqsəd işğaldan azad olunmuş ərazilərdə əhalinin əsas məşğuliyyətlərindən biri olan heyvandarlığın, həmçinin heyvan kəsimi fəaliyyətinin müasir tələblərə uyğunlaşdırılması, istehlakçıların sağlam ət və ət məhsulları ilə təmin olunması, həmin ərazilərdə fəaliyyət göstərən sahibkarlar üçün əlverişli biznes mühitinin formalaşdırılmasından ibarətdir.İnşa ediləcək yeni heyvan kəsimi məntəqələrində zoonoz xəstəliklərin nəzarətdə saxlanılması, heyvandan insana keçən xəstəliklərin qarşısının alınması ilə yanaşı, həmin ərazilərdə heyvan sağlamlığı və baytarlıq nəzarəti mexanizmlərinin qısa zamanda təşkil olunması da təmin ediləcək.Həmin ərazilərdə yeni heyvan kəsimi məntəqələri Azərbaycan Qida Təhlükəsizliyi İnstitutunun (AQTİ) vəsaiti hesabına yaradılacaqdır. Layihə çərçivəsində mikro və kiçik sahibkarlıq subyektləri ilə iş təcrübəsini nəzərə alaraq, “ABAD” publik hüquqi şəxs layihə iştirakçılarının seçimində iştirak edəcək, onların potensialını və biznes idarəetmə səriştəliliyini dəyərləndirib, ət kəsimi sahəsi üzrə “ABAD”çılar yetiştirəcək və onlara “ABAD” dəstək proqramına daxil olan xidmətlər göstərəcək.İlkin olaraq Ağdam rayonunun Quzanlı qəsəbəsində müasir tələblərə cavab verən heyvan kəsimi məntəqəsinin qurulması ilə bağlı müvafiq təşkilati işlər həyata keçirilmiş, heyvan kəsimi məntəqəsinin tikiləcəyi ərazi müəyyənləşdirilmişdir. Yeni heyvan kəsimi məntəqələrində AQTİ tərəfindən laboratoriyalar qurulacaq, kəsimə və dövriyyəyə çıxarılacaq ət və ət məhsullarına baytarlıq-sanitariya nəzarəti təmin olunacaq.